Pokémon粉絲今年荷包真係要「大出血」！為慶祝Pokémon誕生30週年，官方聯乘一浪接一浪，而最新登場嘅合作夥伴，竟然係來自芬蘭、有過百年歷史嘅國寶級設計品牌Iittala！呢個意想不到嘅組合，將經典的比卡超同北歐極簡美學結合，推出一系列限定餐具，消息一出即刻引起粉絲高度關注，準備要跨國搶購！

比卡超聯名餐具3款晒冷！杯碗碟定價曝光最平¥5280起跳

今次Iittala x Pokémon聯乘系列以品牌經典嘅「Origo」條紋設計為藍本，推出合共3款以比卡超為主角嘅餐具。首先係容量達0.4公升嘅馬克杯，杯身佈滿黃色系條紋，設計簡約又有型，定價為5,500日圓。另一款直徑20厘米嘅碟，正中央印上活潑奔跑嘅比卡超，同樣定價5,500日圓。最可愛嘅必定係容量0.25公升嘅碗，外層係招牌條紋，食晒碗中嘅食物後，就會見到一隻超萌比卡超喺碗底同你打招呼，定價為5,280日圓，係粉絲入門首選！

粉絲注意5月1日日本開賣！東京惠比壽設6日限定打卡位

各位訓練員要mark實日子喇！全系列將於5月1日起，喺日本全國Iittala門市同官方網店正式開賣。如果呢段時間咁啱去東京旅行，就絕對唔可以錯過位於惠比壽Atré主樓嘅特別pop-up！由5月1日至5月6日，現場將會設置一個巨型比卡超同聯名馬克杯嘅打卡位，畀大家瘋狂影相留念。行上5樓就係Iittala專門店，打完卡即刻可以入手心頭好，行程極之完美！

芬蘭百年品牌首度聯乘！簡約設計完美融入Pokémon元素

今次聯乘之所以引發熱話，除咗係Pokémon嘅魅力，更因為Iittala嘅鼎鼎大名。呢個創立於1881年嘅芬蘭品牌，以玻璃製品同簡約設計聞名於世。有趣嘅係，今次採用嘅Origo系列同Pokémon一樣，都係誕生於90年代後期，背景不謀而合。將可愛嘅比卡超融入充滿設計感嘅百年品牌餐具之中，無論係日常使用定係當作收藏品，都絕對係物有所值，難怪粉絲們已經磨拳擦掌，準備要將佢哋帶返屋企！