各位《Final Fantasy》忠實粉絲注意！相信大家同小編一樣，由細到大都幻想過可以騎住可愛又跑得快嘅陸行鳥（Chocobo），喺遊戲世界入面風馳電掣。而家呢個夢想終於唔再係FF，因為有日本公司宣佈，即將喺東京推出一個超像真嘅陸行鳥策騎體驗，各位FF迷係時候要儲定彈藥準備去朝聖啦！

官方預告10月登陸東京兩大熱點

日本VR/XR娛樂設施開發商「Tyffon」正式宣佈，將會同超人氣遊戲《Final Fantasy XIV》破天荒合作，推出名為「Final Fantasy XIV: Chocobo Race VR」嘅全新VR遊戲！官方消息指，呢個萬眾期待嘅設施預計會喺今年10月，率先登陸Tyffon位於東京台場（Odaiba）同新宿（Shinjuku）嘅兩間「Tyffonium」XR體驗館，準備去東京旅行嘅朋友仔絕對要mark實日子！

標榜超強體感沉浸式體驗非一般VR

唔好以為只係戴個VR眼鏡坐定定咁簡單！開發商強調，今次嘅體驗將會係一個集視覺、聽覺同物理感覺於一身嘅超沉浸式挑戰。為咗完美重現遊戲入面「金碟遊樂場」（Gold Saucer）嘅陸行鳥賽跑刺激感，官方預告玩家將會感受到騎喺頂級賽鳥背上嘅速度同震動，暗示設施將會配備非固定式嘅動感座椅，務求令玩家有100%人鳥合一嘅真實快感！

開發商預告或擴展海外市場有機會衝出日本

對於暫時未能飛去東京嘅粉絲都唔使灰心！Tyffon公司表示，目前正計劃將旗下嘅體驗館擴展到日本國內其他地區以至海外市場。考慮到《Final Fantasy》系列喺全球嘅驚人號召力，相信呢個「陸行鳥VR賽跑」將來好大機會會跟住衝出日本，登陸世界各地。不過喺呢一日來臨之前，今年10月去開東京嘅朋友，就絕對唔可以錯過呢個率先體驗做個「最強陸行鳥騎師」嘅機會喇！