M記開心樂園餐嘅玩具，向來都係唔少人嘅童年回憶，如果聯乘人氣角色，更加會引發搶購潮！最近日本麥當勞就同紅遍全球嘅《Chiikawa》合作，推出一系列超萌公仔，唔少粉絲都磨拳擦掌準備入手。不過諗起以往排長龍、黃牛黨瘋狂掃貨再天價轉售嘅混亂場面，真係令人卻步。點知今次M記竟然出招反擊，有日本記者就親身實測，結果完全意想不到！

麥當勞出絕招打擊黃牛黨每人限買4份兼App限定

為咗唔想可愛嘅Chiikawa公仔淪為炒賣工具，日本麥當勞今次嚴陣以待，推出超強硬嘅「反黃牛策略」。喺開賣首日，顧客必須使用官方手機App落單，而且每個時段（早上或下午/晚上）最多只可以買4份開心樂園餐！就連日本大型二手買賣網站Mercari都發聲明，會協力下架所有炒賣Chiikawa公仔嘅商品。有日媒記者就去其中一間分店實測，發現新規定果然超有效，現場完全冇人龍，亦唔見有人大手掃貨，成功杜絕黃牛惡行。

日媒記者實測買4份開箱驚見奇蹟一擊即中儲齊全套

為咗測試運氣，該名記者決定買盡限額，一次過買咗4份開心樂園餐，盛惠540円一份，心諗就算抽唔齊都可以當幾日嘅午餐。佢滿心期待咁逐個盒打開，點知奇蹟竟然發生！4個盒入面竟然係4款完全唔同嘅公仔，一擊即中儲齊全套，運氣好到嚇親人！呢套第一彈公仔包括經理造型嘅Chiikawa、外賣員Hachiware同Rakko，仲有McCafe員工造型嘅Kuri-Manju（栗子饅頭），全部都神還原角色設定，萌爆指數滿分！

公仔高8cm仲可當筆套第二彈5月29日接力登場

呢套Chiikawa公仔每隻大約高8cm，比之前牛肉飯連鎖店Matsuya送嘅公仔大得多，擺喺枱頭勁有存在感。而且公仔底部仲有小孔，可以當成筆套，可愛又實用！官方亦已宣佈，第一彈換購期去到5月28日，而第二彈另外4款全新公仔將會喺5月29日至6月11日接力登場。睇嚟今次M記嘅反黃牛措施相當成功，各位準備去日本旅行嘅粉絲，可以放心去換購心頭好啦！