相信唔少80、90後機迷，對「↑↑↓↓←→←→BA」呢串神秘指令絕不陌生！細個打機卡關，又或者想屈機屈到尾，只要喺手掣輸入呢個「秘技」，就可以即刻變勁，甚至拎多30條命！呢個堪稱Game界最偉大嘅發明，原來不知不覺已經40歲。為咗慶祝呢個大日子，官方Konami最近就宣佈咗一連串慶祝活動，消息一出即刻勾起全球機迷嘅集體回憶！
40年前無心之失變傳奇秘技 官方推連串活動賀壽
呢個被譽為「Konami Code」嘅秘技，最早其實係源於1986年紅白機（Famicom）版本嘅《Gradius》。據聞當時係開發人員為咗方便測試，意外留低喺遊戲入面嘅一組程式碼，點知陰差陽錯之下，俾玩家發現咗可以將架太空船即時「Full Power」！後來呢個秘技喺另一款經典遊戲《魂斗羅》（Contra）發揚光大，可以幫玩家一開波就獲得30條命，令佢紅遍全球，更成為健力士世界紀錄認證「最廣為人知嘅遊戲秘技」。為慶祝40週年，Konami特設紀念網站，更推出一系列印有官方角色「Nami-chan」嘅紀念T-shirt，等一眾老鬼機迷可以著上身懷緬一番。
消息引爆機迷集體回憶 網民洗版：童年打爆機全靠佢
40週年嘅消息曝光後，隨即引爆機迷洗版式討論，唔少人都話回憶返晒嚟！有網民慨嘆：「細個手殘，打爆機真係全靠佢」、「以前同啲friend鬥快撳，諗返起都好熱血」、「呢個code重要過我電話號碼」。大家紛紛憶述當年圍喺部電視機前面，對住部遊戲機又吹又撳嘅情景，呢串簡單嘅指令，承載住嘅係一代人嘅童年同青春，絕對係機迷之間先會明嘅浪漫。
6款經典遊戲配樂上架串流 Gradius系列名作一次過聽
除咗出T-shirt，Konami今次仲做咗件令老機迷非常滾動嘅事，就係將6款《Gradius》系列同相關遊戲嘅經典配樂，一次過上架到各大音樂串流平台！當中包括紅白機版《Gradius》、《Gradius II》、《Gradius III》等經典作品嘅原聲帶。以後大家隨時隨地都可以重溫當年嘅熱血BGM。官方更透露，呢個傳奇秘技未來將會喺開發中嘅Web3遊戲平台「Project Zircon」出現，睇嚟呢個經典將會以新形式，繼續流傳到下一個世代！
