出家人不是應該六根清淨、看破紅塵嗎？但日本最近就爆出一單驚人案件，一位和尚竟然在兩年間，憑一張喺街邊執到嘅健保卡，於全國各地瘋狂睇醫生超過100次！誇張行徑被揭發後，隨即引爆網絡熱議，唔少人都質疑佢究竟係修行定係呃人！

犯案手法極蠱惑兩年盜用115次

事件主角係一位55歲、名叫廣賀輝和嘅和尚。據報佢當時正處於「休假中」，未有隸屬任何寺廟。佢向警方供稱，早前喺東京街頭執到一張屬於一位60多歲男士嘅健康保險卡後，就心生歪念。自2024年3月起，佢就開始用呢張卡四處睇醫生同攞藥。為咗唔被揭穿，佢更刻意「全國巡遊」，專登去大阪、岡山、京都等唔同城市犯案，以為神不知鬼不覺。點知天網恢恢，佢喺兩年內足足盜用咗115次，平均每星期就用一次，最終因為使用記錄太過頻繁而斷正，喺大阪一間醫院當場被捕。

網民群起公審鬧爆質疑其賣藥圖利

事件曝光後，大批網民替無辜嘅卡主不值，同時亦對呢位和尚嘅操守提出強烈質疑，留言喺各大討論區洗版！有網民鬧爆：「叫佢剃光頭好好反省下啦！」、「修行修到走去犯法？」更有醒目網民指出疑點：「平均一個禮拜睇一次醫生？太可疑啦！警方應該查下佢係咪轉售啲處方藥物圖利！」唔少人亦推測佢可能離開寺廟後就冇咗健保，先會出此下策，但無論如何都不能將犯法行為合理化。

事件揭傳統健保卡漏洞意外推動新制

呢單和尚盜用健保卡案，除咗案情本身夠晒離奇，更意外揭示咗日本傳統健保卡嘅巨大保安漏洞。由於舊式卡上無相片，使用時亦唔需要密碼或生物認證，基本上係「認卡唔認人」。好多網民就藉此力撐政府近年推行、附有相片同晶片嘅「MyNumber卡」制度，認為「如果一早轉用MyNumber卡就唔會發生呢啲事」。呢次事件令社會再次關注個人資料安全問題，而犯案和尚嘅真正動機，仍有待警方進一步調查先會水落石出。