溫書溫到天昏地暗，但轉個頭就唔記得？無論係DSE學生哥要背海量嘅課文，定係打工仔要記實客戸資料，記性差總係令人相當頭痛。最近，日本一項最新研究或者可以為你解開謎團！有研究團隊驚人發現，原來記憶力好壞，竟然同我哋日常嘅呼吸方式有極大關係，只要掌握到一個簡單秘訣，記憶效率隨時可以倍增！

日本研究實測30人 鼻插導管揭記憶與呼吸驚人關係

今次研究由日本兵庫醫科大學醫院等機構主理，亦係首次以人類作為研究對象。研究團隊搵嚟30名參與者，並喺佢哋鼻哥窿插入導管，用嚟精準記錄呼吸時嘅氣流數據。實驗過程相當直接，研究人員首先向參與者快速展示40張唔同嘅動植物圖片，每張相只停留1秒。之後，再將呢40張相溝埋另外40張新相，總共80張圖片，要求參與者逐一辨認邊啲係之前見過嘅。成個過程就係要測試佢哋喺唔同呼吸狀態下，記憶力有咩分別。

結果震驚專家團隊 「呼氣」竟是黃金記憶時機

實驗結果出爐後，連研究團隊都大感意外！數據顯示，如果參與者係喺「呼氣結束時」記低圖片，佢哋之後認出圖片嘅反應速度，明顯比喺「吸氣開始時」記憶快得多。換言之，喺我哋呼氣嘅時候，大腦對於新資訊嘅處理同儲存效率可能係最高嘅！雖然喺答案嘅準確率上冇太大分別，但反應速度嘅差異，足以證明「呼氣」就係我哋背書、記嘢嘅「黃金時機」。事件曝光後，唔少網民都話大開眼界，紛紛表示「難怪唱歌學日文會咁入腦」、「原來細細個阿媽叫我朗讀課文係啱嘅」。

DSE學生哥必學！專家教路1招即學即用記憶法

呢個發現對於日日都要同書本搏鬥嘅學生嚟講，絕對係一大福音！研究指出，下次溫書或者需要記低重要資訊時，可以嘗試喺呼氣嘅尾聲，將要記嘅內容大聲讀出嚟。呢個簡單嘅動作，結合咗「呼氣」同「發聲」兩個元素，可以大大加強記憶連結。就好似學新語言時跟住歌詞唱歌一樣，比起單純默念，效果更為顯著。各位準備緊考試嘅朋友，不妨即刻試下呢個「呼吸記憶法」，話唔定可以幫你輕鬆KO沉重嘅溫習內容！