去日本旅行，食拉麵是常識吧！不過，平時食開的豚骨、醬油、味噌湯底已經滿足唔到你？最近有日本記者就去到東京一間拉麵店「吉岡」，挑戰一款號稱「食一次就返唔到轉頭」的超狂拉麵。單睇門口個招牌已經夠晒氣勢，點知碗麵一上枱，記者當場嚇到呆咗，直呼瘋狂！

東京拉麵店挑戰味蕾極限 驚見200g蒜蓉地獄嚇窒食客

事主表示，呢間位於東京目白區的拉麵店「吉岡」，主打一款「蒜蓉拉麵」（Ninniku Ramen），店家更囂張地標明，每一碗都用足足200克蒜頭！200克係咩概念？即係等於一次過鯨吞大約40瓣蒜頭，諗起都覺得恐怖！當碗麵送到面前，視覺衝擊力更加驚人，只見幾十粒原隻蒜頭塞滿晒成個碗，多到可以當粟米片咁用匙羹一啖啖食，湯中間仲要有一大坨蒜蓉醬，完全係名副其實的「蒜蓉地獄」，瘋狂程度令人咋舌！

事主實測味道超乎想像 湯底濃稠到變「蒜蓉糊」勁誇張

面對呢碗重口味拉麵，事主鼓起勇氣一試，形容味道係「可以想像到最猛烈嘅蒜頭衝擊」！不過，神奇嘅係，食到第二啖麵，味蕾竟然已經習慣咗，甚至覺得非常幸福。事主大讚麵條質素極高，口感爽滑彈牙。最誇張嘅係個湯底，因為落咗海量蒜頭，湯汁竟然變得好似「蒜蓉糊」一樣，呈現出一種蓬鬆又黏稠嘅奇特質地，絕對係前所未有嘅拉麵體驗！

盛惠1500円包一次免費加麵 唯一缺點食完成身味返唔到工

呢碗蒜蓉地獄拉麵盛惠1,500円（約76港元），雖然價錢偏高，但考慮到佢落足200g蒜頭，仲可以免費追加一次麵底，事主都話完全唔覺得係「當客係水魚」。不過，想挑戰嘅朋友要注意，呢間拉麵店只做午市，意味住你將會頂住一身超濃烈嘅蒜味過埋下半日，想靜靜雞返公司都幾難。雖然如此，事主仍然力推，話對於蒜頭愛好者嚟講，呢個畢生難忘嘅體驗絕對值回票價！