去日本旅行又有新景點！東京全新大型商場「高輪Gateway City」3月底先盛大開幕，憑住型格設計同直通JR山手線站嘅便利，即刻成為遊客同本地人嘅朝聖熱點。點知開幕唔夠2個禮拜，商場內一條打卡必到嘅「宏偉樓梯」竟然爆出設計醜聞，被狠批係「食人陷阱」，搞到至少2人受傷，究竟發生咩事？

樓梯暗藏3倍殺人級高低差陷阱

事件主角係連接JR高輪Gateway站同一座商場嘅主樓梯。呢條樓梯設計大玩花臣，將樓梯同長櫈功能二合一，中間區域設計成一層層嘅座位區。理想好豐滿，現實卻好骨感！有事主大呻，由樓梯頂向下望，因為視覺錯覺，根本分唔清邊度係樓梯、邊度係櫈。好多人當正成條都係樓梯咁行，點知中間座位區嘅梯級高度，竟然係正常樓梯嘅3倍！唔少人行到一半先發現「斷崖式」梯級，結果收唔切掣，開幕短短兩星期就搞到至少2人受傷仆倒，真係牙煙過行鋼線！

事件曝光後網民鬧爆設計離地反人類

事件經日媒報導後，大批網民替事主不值，即刻群組洗版鬧爆！有網民怒斥：「設計師到底有無用腦諗過實用性？」、「為咗打卡靚，連基本安全都唔要！」、「呢啲設計根本反人類，長者同細路點算？」有喺附近返工嘅白領接受訪問時都話，未聽聞有人受傷前都唔覺有問題，而家知道咗就覺得好危險。亦有帶住小朋友嘅家長表示，啲長櫈級級都咁高，真係唔可以睇漏眼，否則後果不堪設想，直指商場管理方考慮不周。

JR東日本急補鑊用鐵鍊圍封惹議

收到大量投訴同出事報告後，負責管理商場嘅JR東日本終於跪低，承認樓梯設計存在潛在危險。為咗唔再有人「中伏」，佢哋拿拿聲用鐵柱同鐵鍊，將中間成個座位區域圍封起嚟，禁止任何人進入，再引導人流只用兩邊嘅正常樓梯。不過呢個做法被批評只係斬腳趾避沙蟲，有網民質疑「咁靚嘅設計，結果要用鐵鍊圍住，勁肉酸」、「成個公共空間廢咗武功」，認為當局應該加裝扶手同清晰指示，甚至徹底修改設計，先可以真正解決問題。