想當年一句「Let it Rip!」，一眾80、90後就會衝到公園或者走廊，同朋友仔嘅戰鬥陀螺一決高下！陀螺對戰絕對係唔少人嘅童年回憶，輸贏固然重要，但最心痛莫過於見到自己嘅「愛機」被撞到粉身碎骨。不過最近日本就有一個超狂新玩法，將戰鬥陀螺同零食結合，打輸咗嘅下場竟然係直接食落肚，真係聽到都覺得衝擊！

日本零食廠推DIY戰鬥陀螺糖果！3款模具自製攻擊防禦持久型

日本知育菓子大廠Kracie將於7月6日推出一款名為「Custom Koma King」的DIY戰鬥陀螺糖果，徹底顛覆大家想像！呢款零食就好似大家細個玩開嘅「知育菓子」一樣，俾你一包包魔法粉末，只要加水攪拌，就可以親手製作出獨一無二嘅戰鬥陀螺。套裝內有可樂、檸檬、梳打3種口味嘅糖粉，可以互相混合，調配出超級可樂、檸檬可樂等新口味，顏色仲可以自由配搭，整成彩虹陀螺都無問題！最關鍵嘅係，套裝附有3款唔同形狀嘅模具，分別係持久力強嘅「花朵型」、防禦力高嘅「翅膀型」，同埋攻擊力十足嘅「尖角型」，玩家可以根據自己嘅戰術去揀，陀螺嘅軸心仲係一條提子味糖果棒，成個陀螺由頭到尾都食得落肚！

網民熱議自製陀螺新玩法！考手工更考物理平衡食得又玩得

消息一出，即刻引起大批陀螺迷關注，唔少網民都話呢個玩法超有新意！有別於工廠製嘅標準陀螺，呢款糖果陀螺完全係純手工製作，由溝粉、倒模到成形，每一步都考驗玩家嘅手藝同耐性。有網民就分析，陀螺嘅對稱性同平衡感會直接影響旋轉表現，所以製作過程絕對唔可以馬虎，變相增加咗一層技術挑戰。官方建議，除咗可以用附送嘅小托盤試玩，想同朋友仔嚟場世紀大戰，仲可以用大碟或者乾淨嘅鑊做戰鬥盤，場面肯定超壯觀！最重要係，就算自問無天份，整唔出完美陀螺，都可以發揮創意，整個獨一無二嘅「原創劣品」，反正都係要食落肚！

戰敗陀螺下場超療癒！輸家直接食落肚網民：史上最和平嘅決鬥

呢款DIY陀螺最爆嘅一點，就係戰敗陀螺嘅「下場」！以往打陀螺，輸咗嘅一方可能會唔開心，甚至見到「愛機」戰損會好心痛。但係玩呢款糖果陀螺就完全無呢個煩惱，因為無論係贏家定輸家，對戰完畢後嘅唯一指定動作，就係將戰鬥陀螺直接食落肚！輸咗嘅一方可以「品嚐失敗嘅滋味」，將帶住梳打同提子味嘅陀螺食清光，然後再接再厲整過個新嘅。唔少網民都大讚呢個設定超療癒，簡直係「史上最和平嘅決鬥」，輸贏都咁開心，絕對係Win-Win雙贏！