又到日本旅行旺季，各位準備好返鄉下未？每次去日本，行程總唔少得去Starbucks朝聖，試勻當地限定飲品！今年夏天，日本Starbucks再度出擊，宣布將於6月24日起推出全新蜜桃系列，一次過帶來3款唔同口感嘅蜜桃特飲同一款精緻蛋糕，蜜桃控真係要準備失心瘋喇！
3款全新蜜桃特飲各有千秋 星冰樂果肉茶飲梳打任你揀
今次蜜桃祭可謂誠意十足，3款飲品各有特色，滿足唔同口味嘅粉絲。首先係自2015年起已成為夏日定番嘅「蜜桃牛奶星冰樂」（720円），主打入口即溶嘅蜜桃果肉配上柔滑蜜桃奶，口感豐富得嚟又清爽。想追求刺激啲嘅口感？可以試下全新口味嘅「Chillax蜜桃梳打」（售價由590円至680円），喺多汁嘅蜜桃果肉醬同梳打水之上，加入咗系列獨有嘅青柑橘風味糖漿，飲落去氣泡感十足，超級解渴！最後仲有「特調果肉蜜桃茶」（售價由630円至720円），將蜜桃糖漿同清爽嘅紅茶完美結合，層次感十足。
網民激讚果肉感史上最強 必試紅茶飲品配伯爵茶撻
三款飲品各有捧場客，但其中一款去年回歸後就大獲好評，被粉絲譽為「果肉感最強」嘅必試之選！講緊嘅就係「特調果肉蜜桃茶」，官方資料指佢擁有三款飲品中最多嘅蜜桃果肉，每一啖都好似直接咬緊成個新鮮水蜜桃一樣，口感超滿足！飲品以外，甜品控都唔可以錯過同步登場嘅「白桃伯爵茶撻」（580円）。撻面鋪滿大大小小、幾乎零空隙嘅白桃果肉，內層係香氣濃郁嘅伯爵茶慕絲，配埋酥脆撻底，絕對係夏日最奢華嘅享受。
6月24日全線開賣 會員可享優先預購優惠
想試勻全系列嘅朋友記住喇，呢個蜜桃系列將於6月24日起喺日本全國Starbucks分店限定發售。如果你係Starbucks Rewards會員，仲可以喺6月22日起，透過手機落單優先品嚐「特調果肉蜜桃茶」（只限Tall size）！提提大家，除咗蜜桃系列，日本Starbucks同期仲有麝香葡萄、檸檬同菠蘿等限定飲品，成個水果盛宴咁，今個夏天去日本真係有排飲！
