日本Cafe甜品賣相犯規！超萌「海豹糯米糍」回歸網民睇到心心眼：為咗佢要即刻飛！

去日本旅行，除了瘋狂購物，當然唔少得去各大Cafe朝聖打卡！日本嘅甜品出名造型精緻，每次有新品推出都成功引爆話題。最近，由人氣家居服品牌Gelato Pique開設嘅Cafe就再度「出招」，推出一系列以海洋動物為主題嘅甜品，可愛程度爆燈，淨係睇相都已經令人少女心大爆發，唔少人已經準備好要為咗佢即刻買機票！

海豹海象水獺齊登場4款海洋動物甜品萌爆登場

今次Gelato Pique Cafe推出嘅「海洋動物甜品系列」真係誠意十足，打頭陣嘅係去年大受歡迎、強勢回歸嘅「煙韌海豹Crepe」（¥1,290）！軟糯嘅麻糬皮包住黑芝麻雪糕，化身成超萌嘅海豹BB，Crepe入面仲有滿滿嘅忌廉、Tiramisu忌廉、芒果同杏仁片，口感豐富。同場加映仲有全新登場嘅「冰涼海象Crepe」（¥1,290），用上朱古力香蕉雪糕做主角，配上棉花糖做成嘅長牙，像真度極高！如果唔想食Crepe，仲有「漂浮水獺Gelato」（¥840），黑芝麻雪糕筒上面有隻可愛水獺仔，連對手仔都用黑芝麻忌廉唧出嚟，細節滿分！想消暑解渴，就一定要試埋杯「Q彈企鵝梳打」（¥890），喺Ramune梳打入面加入菠蘿味嘅啫喱小魚，上面再放上牛奶味Gelato同企鵝造型威化餅，真係睇得又飲得！

網民睇到心心眼瘋狂洗版高呼為食好西即刻飛

呢個海洋動物系列一出，即刻喺日本網上引發洗版式討論，唔少港人睇到都心心眼，紛紛喺各大旅遊群組分享，tag爆朋友話要去日本朝聖！大批網民睇到相都忍唔住大讚「可愛到犯規，點捨得食呀！」、「為咗呢隻海豹，我即刻買機票都得！」。有網民就話，雖然個Crepe要成千二Yen，但為咗打卡同埋呢個萌樣，絕對係「呃like」神器，「幾貴都抵返晒」！睇嚟今個夏天，Gelato Pique Cafe又會成為港人遊日嘅必去打卡點。