去日本旅行，日日飲咖啡都唔出奇，但你有無諗過可以飲到江戶時代武士飲嘅咖啡？最近有日本記者去到青森縣弘前市，實試一款盛惠600円（約港幣$29）嘅「武士咖啡」，點知一上枱竟然唔係咖啡杯，而係一個日式茶壺，飲法同味道更加係完全顛覆想像，體驗極度衝擊！

記者實試600円武士咖啡 驚見茶壺上枱兼送麻布袋

事源記者去到青森縣弘前市一間名叫「Salon de Café Ange」嘅復古咖啡店，專程挑戰呢款根據古書食譜重現嘅「武士咖啡」。點知咖啡一上枱，記者就嚇一跳！皆因侍應送上嘅並非一般咖啡杯，而係一個日式茶壺，打開壺蓋，裡面更只有一包用麻布袋裝住嘅咖啡粉，外型極似宮崎駿《龍貓》入面嘅橡果袋，亦有啲似浸浴用嘅中藥藥包。原來呢個就係江戶時代嘅沖泡方式，將裝滿熱水嘅茶壺，放入呢個「咖啡版茶包」浸泡，夠晒原始！

以為藥水味點知似黑豆茶 味道溫和口感勁衝擊

事件曝光後，唔少人都好奇呢款「武士咖啡」嘅味道。由於歷史記載呢款咖啡係當年畀武士預防腳氣病嘅藥用飲品，記者原本都預期味道會好似中藥或涼茶一樣苦澀。佢將麻布袋浸泡咗一段時間，倒出嚟嘅咖啡顏色偏淡，呈琥珀色。點知鼓起勇氣一試，味道竟然完全唔苦！口感反而非常溫和，味道偏淡，激似日本人常飲嘅「黑豆茶」，甚至帶點青草味，加上沖泡時間長，入口時溫度已變微溫，順滑感覺同飲茶無異，完全顛覆對咖啡嘅認知！

揭秘江戶時代防病秘方 全市10間店舖限定供應

原來呢款「武士咖啡」大有來頭，據講日本最早養成飲咖啡習慣嘅，就係弘前藩嘅武士。當年幕府為咗預防派駐到北海道嘅武士患上腳氣病，就將咖啡豆當成藥物配給佢哋。為咗保存呢段「咖啡之城」嘅歷史，現時弘前市內共有10間店舖提供呢款「武士咖啡」。下次大家去青森旅行，除咗食蘋果批，都不妨去試下呢款武士限定嘅古早味咖啡，體驗一下穿越時空嘅感覺！