去日本旅行，行便利店同超市掃貨是常識吧！不過便利店選擇唔夠多，超市又太大間行得攰。日本便利店巨頭Lawson最近就睇中呢個市場缺口，喺東京開設全新概念店「L Minimart」，將便利店同超市二合為一！新店5月28日一開幕，即時引發當地人瘋狂朝聖，未開門已經大排長龍，場面墟冚到爆，目測至少200人排隊等住衝入去掃貨，究竟有咩咁吸引？
逆天價商品逐樣睇平到你唔信
新店L Minimart主打「迷你超市」概念，店內商品種類比一般便利店多勁多，尤其係生鮮食品同食材，簡直係主婦同遊客嘅天堂！最誇張嘅係店內掛滿黃色「激安」價錢牌，樣樣都平到嚇死人！開幕優惠包括98円（約HK$5）一大梳香蕉、最平49円（約HK$2.5）一磚豆腐，真係平過香港買支水！而最震撼全場嘅，莫過於只賣298円（約HK$15）嘅「唐揚炸雞海苔便當」，另外仲有499円同399円兩款便當任君選擇。飯糰都係回到過去嘅價錢，最平129円（約HK$6.7）就有交易，甜品控仲可以喺自助區以100円（約HK$5.2）一件嘅價錢任揀大福等和菓子，呢個價錢真係返唔到轉頭！
網民實測15蚊便當份量真相曝光
事件曝光後，大批網民睇到嘩嘩聲，紛紛表示要去朝聖！不過，有日本記者就即場實測呢個全城熱話嘅298円（約HK$15）炸雞便當，發現入面除咗炸雞，仲有可樂餅、磯邊揚（天婦羅海苔）同牛蒡絲，味道相當唔錯。但佢亦坦言，便當份量有啲「的骰」，以食量嚟講只算係「合理價錢」，未到「超級抵食」嘅程度。不過網民就話完全唔介意，大讚「15蚊你想點」、「加多少少錢買多件炸雞咪得囉！」無錯，由於便當價錢極平，大家可以輕鬆加購168円（約HK$8.7）嘅炸雞，或者96円（約HK$5）嘅新潟縣產鹽味飯糰，埋單都係超平！
獨家公開店內優惠日曆慳錢攻略
L Minimart除咗日常標價夠平，仲學足超市玩法，推出「輪流折扣日曆」！店內貼出告示，預告未來唔同日子會有指定商品做額外9折優惠，例如雞蛋、納豆、泡菜同三文治麵包等，幫大家慳得一蚊得一蚊！今次新店開喺東京近郊嘅小平市，雖然唔係市中心，但開幕日嘅墟冚情況已經證明呢種「迷你超市」極具潛力。下次去東京，不妨將呢個新景點加入行程，體驗一下日本最新最潮嘅掃貨模式啦！
