日本Converse突發聯乘！京都限定「和服布」波鞋靚到癲網民：唔使再迫買Onitsuka Tiger！

去日本旅行買波鞋，除咗Onitsuka Tiger，好多香港人都會專攻日本版Converse，貪佢質素好款式又夠特別！最近日本Converse又有新搞作，突發聯乘京都一間百年布廠，推出一系列「和風」波鞋，精緻到令人尖叫，睇嚟大家嘅遊日必買清單又要更新，銀包真係危險喇！

京都百年布廠聯手打造4款絕美和風設計

今次Converse Japan搵嚟京都清水寺山腳下嘅織物工房「京都一布や」合作，將傳統和風美學注入經典All Star鞋款，誠意十足！系列總共有4款鞋，全部採用高級和服布料，仲搵埋舞妓做生招牌，和風韻味爆燈！最矚目嘅一定係賣緊16,500円嘅高筒款，鞋面用上高級和服專用嘅「京友禪」染色技術，圖案勁精細；另外仲有採用縮緬布料嘅山茶花、菊花同櫻花款式，價錢由13,200円起，每一對都靚到可以當藝術品！

獨特片假名Logo加持粉絲表示必買

消息一出即刻震撼一眾日本旅遊達人同波鞋迷！唔少人大讚設計「靚到癲」，將傳統工藝同潮流完美結合，比起周街都係嘅黃色Onitsuka Tiger更有收藏價值！今次聯乘系列細節位都做到足，除咗鞋踭位有一布や嘅Logo，最特別係腳踝嘅圓形招牌Logo，竟然將「Converse All Stars」轉成日文片假名，呢個獨特設計令粉絲大為驚喜，紛紛表示「為咗個Logo都要買」、「去旅行一定要入手」！