講起東京新宿歌舞伎町，大家第一時間諗起嘅可能係五光十色嘅霓虹燈、年輕人嘅夜生活，甚至係龍蛇混雜嘅牛郎店。但你又有冇諗過，呢個地方竟然同一班公公婆婆扯上關係？最近，歌舞伎町就出現一個超暖心嘅企劃，主角竟然係一杯Mojito雞尾酒，而背後嘅「供應商」更係一班老友記，成件事嘅反差感真係勁到爆！

新宿牛郎店驚現「阿婆Mojito」！揭開跨代合作暖心企劃

原來，呢個名叫「新宿Day Service Mojito」嘅計劃，係由當地一間長者日間服務中心「Shinjuku Day Service」同經營大量餐廳、酒吧甚至牛郎店嘅「Smappa! Group」破天荒合作搞出嚟。成個運作模式係咁：首先由農場提供有機薄荷葉種子，再由一班公公婆婆喺中心內義務性質、按照自己嘅節奏親手種植。收成之後，呢啲充滿愛心嘅薄荷葉就會直送到歌舞伎町多間合作嘅餐廳、酒吧同牛郎店，由佢哋調製成獨一無二嘅特色雞尾酒，再賣俾客人！

公公婆婆親手種植薄荷葉！為晚年生活尋找存在感與價值

點解要搞咁大壇嘢？主辦單位話，呢個計劃唔單止係為咗搞搞新意思，最重要係想為區內嘅老友記創造生活目標同存在感，等佢哋覺得自己唔單止係社區一份子，仲可以為成個歌舞伎町作出貢獻！有研究仲話，種植過程對老人家嘅身心都有益，可以保持佢哋感官同認知能力敏銳。而喺日本花語入面，薄荷葉正正有「美德」同「溫暖情感」嘅意思，用嚟形容呢個計劃真係再貼切不過，成件事真係勁窩心！

下次去東京記得要去支持！公開參與計劃餐廳酒吧牛郎店全名單

事件曝光後，唔少網民都大讚呢個企劃非常有意義，仲話下次去東京一定要去「幫襯」！如果你都想支持下呢班可愛嘅公公婆婆，可以去以下位於歌舞伎町嘅參與店舖，點一杯「愛心Mojito」。呢個絕對係一個超有意義嘅旅遊體驗，飲杯嘢都可以做善事，何樂而不為？參與店舖包括人間レストラン、麦ノ音、MISO SOUP、BRIAN BAR、red.、世阿弥、ありんす、デカメロン ギャルバー、PEGASUS、BAR CACCO、クラブ春，甚至連APiTS、AWAKE、CURE等多間牛郎店都有份！