去日本旅行又有新景點！各位寶可夢訓練家注意，以後去日本又多一個必去朝聖打卡點！最近日本官方宣布，將於石川縣開設一個全新的寶可夢主題足浴設施，最重要嘅係竟然完全免費入場！消息一出，大批粉絲已經話要準備訂機票，究竟呢個神秘新景點有幾吸引？即刻帶大家睇下！

全新Wakura寶可夢足浴5月12日免費開放

今次呢個全新景點，就係位於石川縣七尾市Yuttari Park內嘅「Wakura 寶可夢足浴」！官方宣布將於5月12日中午12點正式開幕，而且費用全免，各位粉絲可以盡情享受！根據官方發布嘅預覽圖，場內唔單止有超萌嘅比卡超同水伊貝等緊你，就連成日頭痛嘅傻鴨都會喺度同你一齊浸腳放鬆，場面超級治癒！粉絲們又點可以錯過同佢哋打卡嘅機會？

粉絲期待爆燈鯉魚龍水炮注水成焦點

消息曝光後，即刻引爆粉絲洗版式討論！最令大家驚喜嘅，絕對係平時超有霸氣嘅鯉魚龍，今次竟然收起破壞力，改為用「水炮」幫足浴池注水，呢個反差萌設計令網民大讚「可愛到犯規」！其實呢個足浴設施嘅概念，源自當地嘅寶可夢主題渠蓋（Poké Lids），本身渠蓋上只係畫住鯉魚龍同朋友仔浸腳，估唔到官方竟然將呢個「幻想場景」變成現實，誠意十足！

渠蓋幻想場景成真朝聖必影打卡位

呢個足浴設施嘅誕生，源於一個「將幻想變成現實」嘅有趣轉折。本身為咗推廣地區旅遊，官方喺七尾市設置咗一個鯉魚龍浸足浴嘅主題渠蓋。點知呢個設計大受歡迎，官方索性「找數」，直接將公園內嘅足浴設施翻新，變成一個真實嘅寶可夢足浴池！以後大家去朝聖，除咗可以免費同傻鴨、比卡超一齊浸腳，仲可以喺隔離搵返嗰個「夢想成真」嘅渠蓋打卡，絕對係粉絲必到嘅景點！