日本今年元旦日發生嘅能登半島強震，重創石川縣一帶，令唔少人至今依然心有戚戚焉。災後重建路漫漫，點樣吸引返遊客支持當地經濟成為一大難題。不過，最近官方就出動「神獸」級外援，宣佈將會喺災區設置6個全新打卡點，消息一出即刻引嚟全球粉絲關注，準備好去當地「朝聖」出一分力！
官方出手打氣6款全新寶可夢渠蓋登場
為咗幫能登半島災後復興打氣，官方嘅「Pokéfuta」計劃宣佈，將會喺4月29日於能登半島6個唔同嘅市鎮，安裝6款全新設計嘅寶可夢主題渠蓋！每個渠蓋都係獨一無二，仲結合埋當地特色。例如喺以溫泉聞名嘅七尾市，就有鯉魚龍、蚊香蛙皇同蚊香蝌蚪一齊浸溫泉；而喺輪島市，就有甲賀忍蛙型格登場。其他登場嘅寶可夢仲有卡比獸、仙子伊貝、羅絲雷朵同電海燕等等，粉絲們可以一次過捕捉6款唔同嘅可愛設計，真係誠意十足！
粉絲準備瘋狂打卡振興災區旅遊業
消息曝光後，大批寶可夢粉絲已經磨拳擦掌，準備好去日本支持！其實呢個計劃嘅目的有兩個，一嚟係透過可愛嘅渠蓋為粉絲帶嚟歡樂，二嚟就係鼓勵大家親身去到當地，喺現實世界展開一場「寶可夢搜尋之旅」，順便支持當地嘅小店同企業，用行動振興災區經濟。今次揀正喺能登半島設置新渠蓋，就係希望透過寶可夢嘅強大號召力，吸引遊客重臨呢片美麗嘅土地。
打卡點仲有世界第一長櫈長達460米
除咗6個寶可夢渠蓋之外，其中一個打卡點原來仲暗藏玄機！喺志賀町海岸，電海燕同櫻花魚嘅渠蓋就正正設置喺「世界第一長櫈」（Sekaiichi no Bench）旁邊。呢張長櫈喺1989年落成時，曾獲健力士世界紀錄認證為全球最長，長度足足有成460.9米！大家去同寶可夢打卡之餘，仲可以喺呢張超長櫈上面坐低，欣賞能登半島嘅無敵海景，絕對係一個超特別嘅體驗！
