去日本旅行，好多人都會將登上富士山列入人生清單，但原來唔係你想行就隨時行得！最近，就有遊客無視警告，喺富士山尚未開放嘅季節強行登山，結果搞到自己受傷要人救，事件更激到當地市長罕有地喺記者會上「爆Seed」鬧爆，直斥呢啲玩命行為極之荒謬，連累埋救援人員！
市長記者會罕有發火 怒斥自私登山客荒謬心態
事緣本月初，一名中國遊客無視警告，闖入仍然封閉嘅富士山宮口登山道，結果失足跌落路邊斜坡，導致手腳受傷，最終要出動救護車救援。對此，富士宮市市長須藤秀忠喺5月11日嘅記者會上終於忍唔住大動肝火，怒斥呢啲罔顧後果嘅登山客：「『就算要人救，總會有人嚟救我』嘅心態實在太荒謬！」佢強調，救援行動本身就證明咗富士山係一個充滿危險嘅地方，而呢啲自私行為更將救援人員置於險境。市長更提到今年3月，救援隊曾需喺夜間暴風雪中，用雪橇將一名受傷嘅違規登山客運落山，過程驚險萬分，佢心痛表示：「如果救援人員喺行動中受傷，對佢哋嘅家人同上司嚟講，係令人無法忍受嘅憤怒。呢啲登山客簡直係玩X我哋！」
事件曝光網民群起公審 建議重罰亂闖禁區人士
市長嘅一番肺腑之言曝光後，大批網民替市長及救援人員不值，即時群起公審呢啲自私嘅登山客，留言喺討論區洗版！網民鬧爆：「市長講得好！」、「應該要立法，唔會免費救呢啲違規嘅人！」、「救援費用應該要佢哋自己全額負責，我相信大部分人都會支持！」更有激進網民提出更嚴厲嘅懲罰：「根本唔應該去救，等佢哋屋企人自己畀錢去收屍啦」、「應該要罰款」、「直頭要刑事化，拉得！」可見大眾對於呢種不負責任嘅行為已經忍無可忍。
市長去年已發過火 問題依舊未解決登山季即將開始
最令人無奈嘅係，原來呢個問題已經唔係第一次發生。市長須藤秀忠早喺去年5月嘅記者會上，已經就同樣問題表達過憤怒。事隔一年，情況不但未有改善，反而再次發生意外，難怪市長會忍唔住爆發。今年富士山嘅正式開山日期雖然仲未公佈，但預計會喺7月初。市長只希望喺未來兩個月內，唔好再有同類救援事件發生，唔好再有無辜嘅救援人員要為呢啲自私精冒上生命危險。
