去旅行或出街見到新奇事物，好多人第一時間都係攞起手機影相拍片，再Post上IG、Facebook呃Like，分享生活趣聞。不過，如果你喺日本見到屋企門口無端端有隻蟹，就千萬要忍手！最近日本黃金週長假期，竟然出現咗一種新型爆竊手法，匪徒就係利用大家鍾意打卡分享嘅心態，用一隻蟹做餌，等你自投羅網，隨時引狼入室，成間屋被人搬清光！

匪徒踩線手法超進化一隻蟹一條Post即鎖定你屋企地址

綜合日媒報導，呢種新型犯罪手法簡直令人防不勝防！匪徒會專登將活生生嘅螃蟹或者鍬形蟲，呢啲喺市區極之罕見嘅生物，靜靜雞放喺目標住宅嘅門口。當住戶一開門，見到呢個「不速之客」擋路，九成人都會覺得又驚又好笑，忍唔住影相拍片，再興奮地Post上社交媒體，仲會加上「#屋企門口有隻蟹」、「#咩玩法」、「#驚喜」呢類hashtag。就喺你幻想緊個Post會點樣爆紅洗版嘅時候，其實已經墮入咗匪徒嘅天仙局！匪徒會全天候Mon實社交媒體上呢啲關鍵字，再根據你張相嘅背景線索、或者帖文嘅地理標籤，就可以精準鎖定你屋企嘅地址，兼將你嘅社交帳戶同住址連結埋一齊！

事件曝光全城恐慌保安專家教你4招防狼入室自保

事件曝光後，隨即引起當地居民恐慌，唔少人擔心自己會成為下一個目標！保安專家亦緊急發出警告，提醒市民如果遇到類似情況，最佳嘅應對方法就係「沉默是金」，千祈唔好Post上網。同時，專家亦重申家居防盜「四大黃金法則」，教大家自保。第一是「聲音」，安裝警報器係最基本；第二是「光線」，利用感應燈嚇退匪徒；第三是「眼睛」，裝設閉路電視、貼上相關貼紙，甚至同鄰居打好關係守望相助，都能有效阻嚇；最後是「時間」，加裝輔助鎖或防盜安全膜，增加匪徒入屋嘅難度同時間。

沉默是金專家揭7成賊人撐唔過5分鐘即放棄

點解拖延時間咁重要？原來大部分賊人都係「冇耐性」！保安專家引用數據指出，有高達70%嘅爆竊匪徒，如果喺5分鐘內無法成功入屋，就會選擇放棄；而如果時間拖長到10分鐘，更有90%嘅匪徒會知難而退！所以，下次就算喺門口見到識得揮手嘅「蟹朋友」，都記得禮貌地同佢打個招呼就算，將部相機好好袋穩，唔好為咗呃Like，而俾機會匪徒有機可乘，將你嘅貴重財物一掃而空！