年齡從來都唔係問題，體能先係！日本最近發生一單街頭搶劫案，一名60多歲嘅阿婆深夜獨自回家時，竟慘遭14歲少女當街搶劫。當大家以為阿婆只能眼白白睇住血汗錢被搶走時，結局竟然出現驚人逆轉，阿婆嘅超強戰鬥力更令一眾網民睇到目瞪口呆！

深夜街頭遇襲慘遭14歲少女噴面搶走4萬円

事發喺日本埼玉縣春日部市，本月6日夜晚10點半左右，一名60多歲嘅事主阿婆行經一條街時，突然被一名14歲少女從後方偷襲，用力拉扯佢個手袋。少女為咗得手，更向阿婆塊面噴灑不明噴霧，混亂期間阿婆嘅銀包跌咗出嚟，少女即刻執起銀包拔足狂奔，裡面裝住阿婆辛苦賺嚟嘅4萬日圓（約2000港元）！

150米亡命狂追阿婆爆氣制服少女保住血汗錢

雖然雙眼同面部感到強烈不適，但呢位阿婆並無放棄！佢強忍劇痛，即刻向住少女逃走嘅方向亡命狂追。兩人一前一後追逐咗足足150米，最後阿婆竟然成功追到，仲一鼓作氣將對方壓制喺地，直到警察趕到現場。最終阿婆成功保住自己嘅4萬円，而犯案少女就當場被捕，並向警方承認因為「無錢所以想搶錢」。阿婆雖然臉部受傷，但醫生話大概一星期就會好返，真係不幸中之大幸。

網民洗版大讚最強阿婆笑指係春日部防衛隊成員

事件曝光後，大批網民替事主不值之餘，更對阿婆嘅驚人體力同勇氣表示佩服，紛紛洗版留言！有網民驚嘆「60歲可以跑贏14歲，太勵志了！」、「阿婆平時一定有跑開步或者做gym」。由於事發地點係春日部，唔少網民更搞笑留言：「呢個阿婆一定係春日部防衛隊嘅成員」、「野原美冴今年都64歲，合理」、「唔好睇少60歲婦女嘅爆發力」，大讚阿婆係「最強阿婆」！