吉卜力粉絲注意！美國首間龍貓專門店開幕逾400款精品＋限定Tote Bag！但有一點要小心

吉卜力粉絲終於唔使再飛日本朝聖喇！官方周邊專門店「橡子共和國」（Donguri Kyowakoku）一直係粉絲去日本嘅必到景點，店內嘅龍貓、無臉男精品總係令人買到失心瘋。最近官方終於宣佈，將會衝出亞洲，喺美國開設首間分店，以後去美國旅行都有得掃貨喇！

美國首間官方店登陸加州必影巨型龍貓打卡位

今次美國首間「橡子共和國」將會喺加州洛杉磯嘅Del Amo Fashion Center商場內開幕。為咗重現日本店舖嗰種奇幻森林感覺，新店設計將會以《龍貓》為主題，粉絲一踏入店內就好似走入咗森林一樣！而日本分店標誌性嘅巨型龍貓打卡位亦會登場，雖然位置可能由門口移入店內，但官方預告大家可以同佢盡情合照，各位粉絲準備好相機未？

超過400款精品買到手軟滿額即送限定龍貓Tote Bag

事件曝光後，大批粉絲已準備好銀彈掃貨！官方透露，美國分店開幕時將會提供超過400款商品，由經典嘅龍貓公仔到無臉男醬油碟都應有盡有，絕對令粉絲買到手軟！為慶祝新店開幕，官方更推出兩大優惠吸客：凡消費滿100美元，即可免費獲贈一個洛杉磯限定版嘅龍貓Tote Bag；而消費滿10美元，再出示Ghibli Fest 2026電影節門票，仲可以換領一張電影菲林造型書籤，粉絲們絕對要把握機會！