吉卜力消暑神扇補貨！粉絲瘋搶4款龍貓無臉男背面暗藏驚喜細節港幣$45都唔使！

炎炎夏日，香港天氣又濕又熱，真係「出門五分鐘，流汗兩小時」！唔少香港人都會趁暑假飛一轉日本「返鄉下」，順便避暑兼掃貨。如果你係吉卜力粉絲，今個夏天又有大出血嘅理由喇！日本吉卜力專門店「橡子共和國」最近就將一款超受歡迎嘅「消暑神物」重新補貨，設計靚到癲之餘，價錢仲非常親民，勢必再掀起一輪瘋搶潮！

吉卜力推4款傳統團扇每款正反面設計都勁有心思

今次補貨嘅主角就係充滿夏日祭典風情嘅傳統日式團扇（Uchiwa）！官方一共推出4款設計，全部以兩大經典動畫《龍貓》同《千與千尋》為主題，採用竹製框架同和紙製成，質感滿分。最屈機嘅係，每把扇嘅正反面都有唔同圖案，細節感十足！《千與千尋》有兩款，一款係千尋騎住白龍嘅經典場面，背面竟然係老鼠寶寶同小烏鴉狼狽飛行嘅搞笑樣；另一款就係無臉男，背面印上「油屋」嘅「油」字同埋一眾神明客人，勁有心思！而《龍貓》亦有兩款，一款係大家最愛嘅貓巴士載住兩姊妹，背面仲有貓巴士獨有嘅可愛腳印；另一款就係三隻龍貓喺煙花下跳舞，背面大大個「祭」字，夏日感爆燈！

粉絲大讚CP值極高唔止消暑仲可以當迷你海報

消息一出，大批粉絲已經準備好銀彈，大讚呢系列團扇CP值極高！除咗可以撥涼消暑，由於團扇唔可以摺疊，加上精美嘅雙面印刷，好多人都話買返去唔捨得用，直接當成「迷你海報」掛喺牆上做裝飾都一樣咁靚。根據官網資料，除咗貓巴士款長37.5cm之外，其餘三款都係長37cm、闊17cm，長手柄設計無論係放入Tote Bag定係學日本人咁插喺浴衣腰帶都非常方便，絕對係今個夏天嘅必搶item！