吉卜力可樂餅盛惠3300円？粉絲睇真啲嚇親：原來唔食得！

吉卜力動畫嘅美食場面，向來都令粉絲睇到流晒口水，恨不得可以衝入螢幕大快朵頤！其中《紅花坂上的海》主角海同俊一齊食嘅炸可樂餅，更加係經典中嘅經典。最近，官方終於宣佈將呢款傳說級美食商品化，消息一出即刻引起粉絲暴動，個個都準備好銀彈要入手，點知…

吉卜力推經典可樂餅呃晒粉絲原來係一個袋

呢款新鮮「出爐」嘅可樂餅，外型神還原戲中造型，金黃色嘅「麵衣」其實係超柔軟嘅布料，下面仲用埋日式肉舖嘅包裝紙包住，像真度100分！正當大家以為終於可以一嚐心願之際，先發現頂部竟然有條拉鍊！原來呢個根本唔係食得嘅可樂餅，而係一個造型超獨特嘅收納袋，真係呃晒全世界！

產品細節暗藏驚喜標價10円實收3300円

雖然唔食得，但呢個收納袋嘅設計絕對唔馬虎。袋身印有主角海同俊嘅抽象插畫，低調得嚟又可以畀同好一眼認出。最抵死嘅係，包裝紙上面仲貼住一張虛構嘅價錢牌，寫住「可樂餅每個10円」，完美重現60年代嘅物價。不過現實係殘酷嘅，呢個袋嘅實際售價高達3,300日圓（約21美元），同標價相差330倍，真係令人嚇一跳！