講起日本校服，大家腦海中係咪即刻浮現經典嘅水手服同企領「學蘭服」？呢啲充滿青春氣息嘅制服，一直係唔少人嘅集體回憶。不過，時代正在改變，估唔到連最著重傳統嘅日本校園，都迎來咗一場校服大革命！京都府一間公立中學為慶祝創校80周年，竟然破天荒宣佈，將會推出「衛衣（Hoodie）」作為正式校服，消息一出即刻引起熱議！

京都中學80周年搞新意思學生連投3年反對換款校方奇招推衛衣校服

呢間咁前衛嘅學校，就係位於京都府京田邊市嘅田邊中學。為咗迎接明年創校80周年，校方近年一直想革新校服。有趣嘅係，校方過去連續3年就「換唔換做西裝褸款校服」進行全校投票，點知學生們竟然次次都投票支持保留現有嘅傳統水手服同「學蘭服」，可見大家對舊款校服情有獨鍾。面對呢個情況，校方並無強推改革，反而諗到一條絕世好橋——唔取代，而係增加新選擇！一款由學生親自設計嘅灰色拉鍊Hoodie就此誕生，仲可以喺畢業典禮等重要場合穿着，正式升格為校服嘅一種！

價錢平一半兼可機洗勁方便校方為迎合無性別時代

呢件「衛衣校服」唔只款式新潮，實用性同價錢先係最大亮點！校方公佈，呢件Hoodie定價為9,000日圓（約58美元），比起動輒貴一倍嘅傳統水手服或學蘭服上衣，價錢足足平咗一半，對家長嚟講絕對係天大喜訊。更重要嘅係，傳統校服大多需要乾洗，打理麻煩又嘥錢，而呢件Hoodie可以直接放入洗衣機清洗，超級方便！校方喺聲明中提到，推出新校服係為咗「考慮到我哋正處於一個多元化同無性別嘅時代」，設計上更具彈性同包容性。

傳統水手服唔使掉學生可自由配搭新舊校服任你揀

最令學生開心嘅係，新制度下自由度極大。學生唔需要「二揀一」，可以按自己喜好同經濟能力，決定買傳統校服、新式衛衣，甚至「我全都要」都無問題。日日返學前可以隨心情自由配搭，想點襯就點襯。呢項新校服政策將會喺今年11月起正式實施，為日本校園文化寫下創新嘅一頁，唔少人都大讚學校做法夠開明，真正做到與時並進！