韓國人最鍾意蒲café,早午晚餐宵夜飯前飯後,任何時段都堆滿人。可幸是韓國café數量亦相當多,真正是10步1間。以下推介的都係韓國妹豬近日最常出沒的人氣 首爾 cafés ,唔係餐廳裝修靚就係食物飲品精緻到似藝術品咁,要用「大開眼界」4個字來形容。

text : CKL | photo : Woody (原文刊自《新假期》931期)

01 |七彩夢幻蛋白霜餅

少女都鍾意食macaron,Sugar Lane的老闆Cho就認為馬卡龍太普通,周街都有唔夠勁,於是學一樣更加靚、有更多花款變化的蛋白霜餅(meringue)。「與馬卡龍同樣都係用砂糖加蛋白再發打而成,但冇咁甜膩;而我做的meringue係fat free、gluten free,卡路里亦低,好適合女生做下午茶甜點。」

Cho於英國學做meringue,一學學咗5年。回到韓國後就開設Sugar Lane,更強調係全國第一間meringue專門店。睇落好似唔難做,但老闆坦言易學難精。「溫度控制好重要,否則只得其形,但唔夠平滑,好易有裂紋,有裂紋的話,絕對係失敗。」

Meringue一定要新鮮食,才可以嘗到外脆內軟的質感,所以Sugar Lane賣的都是每日即製新鮮貨。除咗逐粒啪,meringue最大好處就係隨時都可以配合任何甜品一齊食,例如Pavlova就係好經典的蛋白霜餅變奏的甜品,Cho更改良做法,加入乳酪及雪糕同食,冇咁膩之餘感覺清涼,夏天食一流。

Sugar Lane
地址:首爾市龍山區綠沙坪大路46段25號(顯示地圖
電話:+82-2790-5333
營業時間:12:00nn-9:00pm (星期六及日)
交通:地鐵6號線「綠莎坪」站2號出口步行約 7分鐘
網址:www.sugarlane.co.kr

02 | 相機不能吃得遲 Pop Art 甜筒

論韓國有看頭的人氣雪糕店,Bistopping必定有份,店子開業3年一直人氣高企,皆因多款既夢幻又華麗兼浮誇的甜筒,除了韓妹,連日本妹都爭相去影相打卡。

Bistopping的甜筒款式有20款唔同造型,雪糕上的曲奇或朱古力toppings都有十幾款:星星、月亮、唇形、心心、皇冠、戒指等等,款款都手掌咁大,甚至更大,可想像將幾款toppings插上雪糕後的造型有多浮誇。

Bistopping由兩姊妹開設,兩個都鍾意食雪糕,別具美術感的姐姐感嘆無論國內外都找不到華麗的雪糕,於是自行研究將浮誇造型的曲奇或朱古力放上雪糕做toppings,而甜筒部分亦刻意好好裝飾。現在兩姊妹分工合作,妹妹負責曲奇烘焙,姐姐負責創作新造型。

Bistopping
地址:首爾市瑞草區新盤浦路47段68號(顯示地圖
電話:+82-(0)70-7792-0409
營業時間:11:00am-9:30pm
交通:地鐵3號線「新沙」站 4號出口步行約4分鐘
收費:雪糕可以揀牛奶、朱古力或乳酪(₩3,500-5,000)+甜筒(免費)+ toppings(₩1,500-2,000)
網址:www.instagram.com/bistopping

 

 

 

 

03 | 插針不入的花花世界

首爾café多的是,所以不愁搵唔到位的;但如果你遇到一間café無時無刻坐滿人,針插都唔入等一大輪都未有位的話,代表呢間café真係好受歡迎,就例如近年當紅的Ver’s Garden。核心外圍大量大葉及垂吊植物,好令人心曠神怡,入到室內更加令人驚嘆——每張枱椅都被大量鮮花與乾花包圍,雖然沒有屏風沒有房,卻有獨立私密的感覺。

全部花都經過精心擺放,色彩搭調到位,絲毫沒有雜亂的感覺。在刺激眼球的鮮艷花卉之中又會間以大葉及垂吊等綠色植物讓眼睛稍作協調,構圖相當悅目。

Café更加會自家種植各種applemint、peppermint、spearmint、迷迭香、香茅、蜜蜂花、木槿花等來製作花草茶或甜品,保證新鮮,令人感受到當中的誠意。其實最讓人感到讚嘆的,就係一室都充滿鮮花與植物,但完全沒有蚊滋亂飛,更沒有殘花快死的臭味,衛生做得相當出色。

Ver’s Garden
地址:首爾市麻浦區東橋路41段10號(顯示地圖
電話:+82-(0)2-3144-1888
營業時間:星期一3:00pm-10:00pm、星期二至五12:00nn-10:00pm、星期六12:00nn-11:00pm、星期日12:00nn-10:00pm
交通:地鐵2號線「弘大入口」站 2號出口步行約11分鐘
網址:www.facebook.com/versgarden

 

 

04 | 簡約網店實體化

AVEC EL是由韓國設計師Rozi同佢老公一齊經營的網上生活小物及服飾品牌,前年於工作室不遠處還開設了同名café。裝修跟網店的風格一致,一樣咁簡約,兼具獨特的個性。地方唔大,約可坐廿多人,坐滿人都幾迫,但簡約舒適的裝修令人好relax。

老實講,去café的路途都幾曲折,要行一段接近45度的斜路,但無阻客人來朝聖,無時無刻爆滿人!皆因這裏的甜品同咖啡真係睇得出心機作,Chiffon cake加勁濃厚忌廉係人氣招牌,cream重奶香,清甜的味道,配合軟到似陣風的Chiffon cake,敢保證一人食兩件都唔覺得膩。

就算唔好咖啡的,來到都要試一杯Ringo latte,latte係滿滿的蘋果甜味,配合奶香味道剛好,再帶埋店內的心頭好走,perfect池!

AVEC EL
地址:首爾市龍山區厚岩洞 41-1(顯示地圖
電話:+82-(0)70-8210-0425
營業時間:12:00nn-8:00pm (星期日休息)
交通:地鐵4號線「首爾」站11號出口步行約14分鐘
網址:avec-el.com

 

 

05 | TWICE子瑜加持生果撻

韓國有間專門做撻的TARR TARR,本店位於本州,連釜山、首爾,甚至泰國都有分店。推介去弘大店,因為得到TWICE的子瑜在Ig加持,不少台灣人遊韓必去。在TARR TARR你只能食到撻,但請放心,種類超級多,每日閒閒哋有30款,當中佔最大比例而又最受歡迎的要數各式生果撻。

用新鮮生果做係基本,分量滿瀉先係重點:青提撻滿滿鋪夠兩層開邊提子;士多啤梨撻最少4大粒;春夏當造、韓國人最鍾意食的韓種柑橘,真係原個放上撻!而撻就大約手掌咁大,所以往往堆到塔咁高,好大方。當然唔好生果撻的都有綠茶紅豆撻、粟米撻、tiramisu tart等選擇。

TARR TARR
地址:首爾市龍山區楊花路6段50號(顯示地圖
電話:+82-1800-2533(綜合電話)
營業時間:11:00am-11:00pm
交通:地鐵2號線「合井」站 3號出口步行約4分鐘
網址:www.instagram.com/tarrtarr1004

 

 

06 | 名師出糕徒 嘗一口優雅蛋糕

話說tre piccoli最出名是tiramisu系列,花款多,融合大量生果,好受韓妹歡迎,強調自家製蛋糕,來自法國名牌廚藝學校Paul Bocuse畢業的師傅,試過後立即感受到法式甜點的精緻;韓國人鍾意Red Velvet cake,糕體軟綿,cream cheese清新沒半點膩;Caramel Marble cake,內裏的Marble cake充滿蛋糕香,面頭的焦糖糖漿看似分量多但甜味剛好。

tre piccoli
地址:首爾市麻浦區延南路5段8號(顯示地圖
電話:+82-(0)2-3144-2327
營業時間:12:00nn-10:00pm(逢星期一休息)
交通:地鐵2號線「弘大入口」站2號出口步行約11分鐘
網址:www.facebook.com/pages/Tre-Piccoli-뜨레-삐꼴리/151836015168156

 

 

07 | 狐獴、北極狐狸、麝貓稀有動物抱抱會

Meerkat Café果然名不虛傳,十幾隻狐獴畀大家摸摸抱抱,但由於佢哋太膽小,只限於已圍圈的區域內活動,限大家只「玩」10分鐘,當然你可以無限排隊再玩無限次。

除咗狐獴要於限制的範圍內接觸,其他大量罕見小動物都可以自由於近千呎場內活動:浣熊、麝貓、北極狐狸、靚到震藍眼睛暹羅貓、小袋鼠等通場跑,大家可以任摸任抱(如果你似佢哋咁靈活跑得快過佢哋的話)。

入場費每人₩7,000/HK$47就可以不限時任意逗留。話明café係咪好期待食物?Sorry,係冇嘅,只有樽裝飲品供應,不過大家志不在嘆茶啦!

Meerkat Café
地址:首爾麻浦區臥牛山路 21段 19-12號3樓(顯示地圖
電話:+82-2333-4683
營業時間:12:00nn-10:00pm
交通:地鐵2號線「弘大入口」站9號出口步行約9分鐘
網址:www.instagram.com/meerkatfriends

08 | 《回答吧1988》 古董咖啡店

蒲café唔係一味去新開嘅,有歷史的咖啡廳都好值得朝拜一番。電視劇《回答吧1988》出現過的Banjul咖啡廳,1974年已開業,多年來吸引唔少藝術家、文化人及音樂愛好者聚會,故此文化藝術氣息濃烈。1998年後重修,成棟樓高5層,有餐廳 、有音樂發燒友聚會的loft;3樓的café最吸睛,其中一幅牆放滿店主多年來收藏的250部咖啡研磨機,甚有氣勢。

配合懷舊氣氛,都用上深色實木枱配歐式闊落梳化椅;仲有布滿四周的古董咖啡壺咖咖匙咖啡杯等裝飾,行個圈慢慢欣賞最快都要半小時。咖啡有12款,都係傳統的大路款式冇玩花巧;驚喜係有超多不同種類的茶,南非茶Rooibos tea、祈門紅茶、印度阿薩姆紅茶等30款。

Banjul
地址:首爾市鐘路區三一大路17段23號(顯示地圖
電話:+82-(0)2735-5437
營業時間:星期一至六11:00am-10:30pm、星期日12:00nn-9:30pm
交通:地鐵1號線「鍾閣」站 4號出口步行約4分鐘
網址:www.banjul.co.kr

延伸閱讀:暑假平遊首爾!旺季住宿$400就有!

延伸閱讀:網民點評 $500↓ 首爾 明洞酒店