網絡潮文叫大家 千祈唔好帶女朋友 去日本著和服,其實去首爾著 韓服 亦一樣!事關除咗會要做奴隸攝影師用盡每一分鐘狂影,仲要為咗件傳說中粉紅色款捱更抵夜去排隊,情況慘過留喺香港OT,實在講出一眾男士心聲,難怪贏盡掌聲!本著「我不入地獄,誰入地獄」的心態,A君決定親自出馬,帶住靚女 model Yoshi 扮演公主病女友上路,唔係去景福宮齋影咁簡單,而係做晒港女去首爾如買妝物、行弘大、街邊怒食等潮事,究竟會唔會頂唔順黑面走人?

01 | 粉紅色韓服?真係可遇不可求!| 忠武路

既然要挑戰,當然要玩到最盡!為咗著到港女最愛的粉紅色款,全世界早 15 分鐘到達 韓服 店,點知竟然開咗門,舖內仲要勁多人,人潮誇張過名牌店 1 折開倉!惟有快手衝入去搵搵粉紅色款,可惜已經全部租出,任務失敗!Yoshi 當然即刻扁嘴,好彩仲見到件粉藍色款,惟有頂住先。舖入面只有 3 個更衣室,唔想等只好就地換衫,不過綁腰帶、紮胸口蝴蝶結等都非常考工夫,好彩店員肯幫幫忙!幾經辛苦終於著好 韓服 ,原來仲要面對另一個 set 頭挑戰,Yoshi 自己整咗 15 分鐘依然披頭散髮,店員手勢亦麻麻哋,膽粗粗問在場韓妹可否幫個忙,竟然一口應承,仲 5 分鐘搞掂,而且髮型 set 得又靚又傳統,簡直係救星!由揀衫到畀錢走人,竟然已經用咗 2 個鐘!講真……我開始累鳥……

02 | 搭地鐵都冇問題?騎呢pose挑逗阿叔! @安國

問過朋友仔,好多人著 韓服 都會以的士代步,難得Yoshi 想體驗當地文化搭地鐵,我一定奉陪到底!以為會有好多人投以奇怪目光,點知完全冇人理!其實韓國人非常習慣旅客著 韓服 周圍去,所以唔好再驚尷尬,剩係去景福宮、北村等景點,著住去弘大行街都唔怕!等車時,Yoshi 本住一生人一次的機會,大膽嘗試以騎呢pose 挑逗阿叔,可惜阿叔見怪不怪,毫無反應,勁好笑!不過著住 韓服 周圍走真係唔多方便,除咗焗到成身汗,行路時要攞起裙尾,綁鞋帶要伸高隻腳,非常麻煩,Yoshi 都話:「一次就夠!」

03 | 烈日當空個妝冇喇……入化妝店補補妝! @三清洞

行咗1個鐘,Yoshi 突然叫停,唔通我終於可以甩難?錯!原來佢只係想補補妝後繼續影……為咗唔好辛苦公主大人,我提議去化妝品店試妝仲方便!行多兩步真係有間舖,當然要試試成唔成功啦!入到Moonshot,韓仔化妝師立即上前招呼,睇完妝物後,多口問佢著韓服行化妝品店係咪好怪?韓仔話原來好普遍,仲即刻幫Yoshi化個新妝,話粉橙色胭脂同唇膏先襯粉藍色韓服,事後更要求自拍合照,咁好服務,Yoshi 當然失控狂買,原來哄女仔都可以好簡單……

04 | 好肚餓!街邊粗魯食魚串! @新村

行多陣,Yoshi 又出招,話好肚餓喎……當然要滿足公主大人的要求,不過臨近食飯時間好多人,惟有食住街邊小食頂頂肚先!去到몬스터치즈떡볶이,全部人立即彈開,連老闆都出嚟問問我哋係咪要食,原來佢話好少人會著住韓服企街邊食嘢,因為怕整污糟件衫要賠錢!不過Yoshi 有理冇理食咗先講,仲要勁粗魯,難為我要隨時準備紙巾阻擋滴下的醬汁,場面好驚險!最後老闆又要合照,證明著韓服企街邊食嘢,實在太騎呢!

05 | 自拍影相冇難度! Oppa ~可以跟我合照嗎? @弘大

既然Yoshi 咁鍾意影相,我決定打大佬,帶佢去弘大影!吓!咁簡單?錯!係去弘大捉oppa 齊齊影!去到其實有啲怯,因為韓國囝囝牛高馬大,如果佢出拳,我惟有毫不反抗以肉體照單全收…… 幸好Yoshi美色搭夠,oppa 回頭率高企,上前話想合照更0.1秒應承,就連正經軍人oppa 都唔放過,非常誇張!影完相問兩句,佢哋都話好少見女仔會著住韓服行弘大,不過佢哋都覺得女仔著韓服時特別吸引,難怪合照冇難度啦!企得愈耐,情況開始失控,竟然有oppa 上前抄牌,可見Yoshi 魅力驚人,所以奉獻各位男朋友,唔想honey 被韓仔評頭品足,就真係「千祈唔好帶女朋友去首爾著韓服」喇!

 

A君點評:咪再去老套景點!

其實同女朋友去首爾著韓服就真係預咗辛苦,不過與其去傳統景點齋影,寧願直接著去行街,測試證明冇人會笑你,所以唔使怕尷尬!一次過 KO 著韓服 + shopping 兩大行程,之後咪可以叫女朋友陪你行波鞋舖囉!

One Day Hanbok
地址:서울특별시 중구 퇴계로 213 일흥빌딩 3층 303호(首爾市中區退溪路213 3樓303室)
電話:+82-(0)70-4202-4310
營業時間:10:00am-8:00pm
收費:₩13,000/HK$90(4小時),₩26,000/HK$180(24小時)

網址:www.onedayhanbok.com
交通:乘地鐵 3號線忠武路站 8號出口步行約5分鐘
備註:想著粉紅色韓服,記得早30分鐘去排隊