網絡潮文叫大家 千祈唔好帶女朋友 去日本著和服,其實去首爾著 韓服 亦一樣!事關除咗會要做奴隸攝影師用盡每一分鐘狂影,仲要為咗件傳說中粉紅色款捱更抵夜去排隊,情況慘過留喺香港OT,實在講出一眾男士心聲,難怪贏盡掌聲!本著「我不入地獄,誰入地獄」的心態,A君決定親自出馬,帶住靚女 model Yoshi 扮演公主病女友上路,唔係去景福宮齋影咁簡單,而係做晒港女去首爾如買妝物、行弘大、街邊怒食等潮事,究竟會唔會頂唔順黑面走人?

t_hanbok_0102_3737

韓妹無懼猛烈陽光,熱辣辣都照著韓服,港女又點會怕喎……
韓妹無懼猛烈陽光,熱辣辣都照著韓服,港女又點會怕喎……

01 | 粉紅色韓服?真係可遇不可求!| 忠武路

既然要挑戰,當然要玩到最盡!為咗著到港女最愛的粉紅色款,全世界早 15 分鐘到達 韓服 店,點知竟然開咗門,舖內仲要勁多人,人潮誇張過名牌店 1 折開倉!惟有快手衝入去搵搵粉紅色款,可惜已經全部租出,任務失敗!Yoshi 當然即刻扁嘴,好彩仲見到件粉藍色款,惟有頂住先。舖入面只有 3 個更衣室,唔想等只好就地換衫,不過綁腰帶、紮胸口蝴蝶結等都非常考工夫,好彩店員肯幫幫忙!幾經辛苦終於著好 韓服 ,原來仲要面對另一個 set 頭挑戰,Yoshi 自己整咗 15 分鐘依然披頭散髮,店員手勢亦麻麻哋,膽粗粗問在場韓妹可否幫個忙,竟然一口應承,仲 5 分鐘搞掂,而且髮型 set 得又靚又傳統,簡直係救星!由揀衫到畀錢走人,竟然已經用咗 2 個鐘!講真……我開始累鳥……

哇……10點開門已經勁多人,啲靚款已經被人拎晒啦!
哇……10點開門已經勁多人,啲靚款已經被人揀晒喇!

如果唔想等更衣室,穿背心牛仔褲去揀衫就可以 直接換,最方便!
如果唔想等更衣室,穿背心牛仔褲去揀衫就可以直接換,最方便!

又有一個男朋友中伏鳥…… 仲要情侶裝,祝你好運!
又有一個男朋友中伏鳥……仲要情侶裝,祝你好運!

在超亂又多人的環境,揀韓服真係好辛苦!睇中記得要揀實唔好放手,放低5秒已經會被拎走!
在超亂又多人的環境,揀韓服真係好辛苦!睇中記得要揸實唔好放手,放低5秒已經被攞走!

整頭髮絕對最麻煩,就連職員都搞唔掂,好彩夠膽叫在場韓妹幫幫手,想靚就唔好怕羞啦!
整頭髮絕對最麻煩,就連職員都搞唔掂,好彩夠膽叫在場韓妹幫幫手,想靚就唔好怕醜喇!

韓服有傳統的打結手法,唔識就記得搵職員幫 手,千祈咪亂整個蝴蝶結呀!
韓服有傳統的打結手法,唔識就記得搵職員幫手,千祈咪亂整個蝴蝶結呀!

02 | 搭地鐵都冇問題?騎呢pose挑逗阿叔! @安國

問過朋友仔,好多人著 韓服 都會以的士代步,難得Yoshi 想體驗當地文化搭地鐵,我一定奉陪到底!以為會有好多人投以奇怪目光,點知完全冇人理!其實韓國人非常習慣旅客著 韓服 周圍去,所以唔好再驚尷尬,剩係去景福宮、北村等景點,著住去弘大行街都唔怕!等車時,Yoshi 本住一生人一次的機會,大膽嘗試以騎呢pose 挑逗阿叔,可惜阿叔見怪不怪,毫無反應,勁好笑!不過著住 韓服 周圍走真係唔多方便,除咗焗到成身汗,行路時要攞起裙尾,綁鞋帶要伸高隻腳,非常麻煩,Yoshi 都話:「一次就夠!」

以為搭地鐵會好尷尬畀人望?錯! 就算坐低都完全無人理,小朋友繼續打機……
以為搭地鐵會好尷尬被人望?錯!就算坐低都完全冇人理,小朋友繼續打機……

著韓服都記得要排隊呀!
著韓服都記得要排隊呀!

韓服裙襬超級長,貪靚Yoshi想影 相時睇落高啲竟然挑戰高踭鞋,點 知綁鞋帶要伸高隻腳,好辛苦!
韓服裙襬超級長,貪靚Yoshi想影相時睇落高啲,竟然挑戰高踭鞋,點知綁鞋帶要伸高隻腳,好辛苦!

為了唔好整污糟條裙,一邊行要一邊拎起裙尾, 仲要勁曬,港女都頂唔順!
為了唔好整污糟條裙,一邊行要一邊攞起裙尾,仲要勁曬,港女都頂唔順!

03 | 烈日當空個妝冇喇……入化妝店補補妝! @三清洞

行咗1個鐘,Yoshi 突然叫停,唔通我終於可以甩難?錯!原來佢只係想補補妝後繼續影……為咗唔好辛苦公主大人,我提議去化妝品店試妝仲方便!行多兩步真係有間舖,當然要試試成唔成功啦!入到Moonshot,韓仔化妝師立即上前招呼,睇完妝物後,多口問佢著韓服行化妝品店係咪好怪?韓仔話原來好普遍,仲即刻幫Yoshi化個新妝,話粉橙色胭脂同唇膏先襯粉藍色韓服,事後更要求自拍合照,咁好服務,Yoshi 當然失控狂買,原來哄女仔都可以好簡單……

韓仔化妝師幫手補妝外,仲教路粉橙唇膏先襯韓服!
韓仔化妝師幫手補妝外,仲教路粉橙唇膏先襯韓服!

事後仲要合照, 作為男朋友(假扮但好入戲)的我真係睇到眼冤!
事後仲要合照, 作為男朋友(假扮但好入戲)的我真係睇到眼冤!

04 | 好肚餓!街邊粗魯食魚串! @新村

行多陣,Yoshi 又出招,話好肚餓喎……當然要滿足公主大人的要求,不過臨近食飯時間好多人,惟有食住街邊小食頂頂肚先!去到몬스터치즈떡볶이,全部人立即彈開,連老闆都出嚟問問我哋係咪要食,原來佢話好少人會著住韓服企街邊食嘢,因為怕整污糟件衫要賠錢!不過Yoshi 有理冇理食咗先講,仲要勁粗魯,難為我要隨時準備紙巾阻擋滴下的醬汁,場面好驚險!最後老闆又要合照,證明著韓服企街邊食嘢,實在太騎呢!

肚餓就完全唔會理人目光,粗魯狂食,你睇……旁邊韓仔韓妹即刻行開呀!
肚餓就完全唔會理人目光,粗魯狂食,你睇……旁邊韓仔韓妹即刻行開呀!

老闆事後狂問我哋做咩要著韓服企街邊,不 能暴露身份的我惟有答:「佢真係好肚 餓……」
老闆事後狂問我哋做咩要著韓服企街邊,不能暴露身分的我惟有答:「佢真係好肚餓……」

05 | 自拍影相冇難度! Oppa ~可以跟我合照嗎? @弘大

既然Yoshi 咁鍾意影相,我決定打大佬,帶佢去弘大影!吓!咁簡單?錯!係去弘大捉oppa 齊齊影!去到其實有啲怯,因為韓國囝囝牛高馬大,如果佢出拳,我惟有毫不反抗以肉體照單全收…… 幸好Yoshi美色搭夠,oppa 回頭率高企,上前話想合照更0.1秒應承,就連正經軍人oppa 都唔放過,非常誇張!影完相問兩句,佢哋都話好少見女仔會著住韓服行弘大,不過佢哋都覺得女仔著韓服時特別吸引,難怪合照冇難度啦!企得愈耐,情況開始失控,竟然有oppa 上前抄牌,可見Yoshi 魅力驚人,所以奉獻各位男朋友,唔想honey 被韓仔評頭品足,就真係「千祈唔好帶女朋友去首爾著韓服」喇!

軍人Sung Yu : 萬歲!韓服係韓國男人 心目中能夠突顯女人 溫柔的感覺。
軍人Sung Yu :「 萬歲!韓服係韓國男人心目中能夠凸顯女人溫柔的感覺。」

 

型男DongChan : 好多朋友仔著韓服都會去三清洞、北村等傳統地方,喺弘大街頭見到真係好特別!
型男Dong Chan :「 好多朋友仔著韓服都會去三清洞、北村等傳統地方,喺弘大街頭見到真係好特別!」

大隻Kyung Muk : 好少女仔會著韓服行弘大, 所以覺得好特別, 路過見到一定會望望!
大隻Kyung Muk :「 好少女仔會著韓服行弘大,所以覺得好特別,路過見到一定會望望!」

A君點評:咪再去老套景點!

其實同女朋友去首爾著韓服就真係預咗辛苦,不過與其去傳統景點齋影,寧願直接著去行街,測試證明冇人會笑你,所以唔使怕尷尬!一次過 KO 著韓服 + shopping 兩大行程,之後咪可以叫女朋友陪你行波鞋舖囉!

One Day Hanbok
地址:서울특별시 중구 퇴계로 213 일흥빌딩 3층 303호(首爾市中區退溪路213 3樓303室)
電話:+82-(0)70-4202-4310
營業時間:10:00am-8:00pm

收費:₩13,000/HK$90(4小時),₩26,000/HK$180(24小時)
網址:www.onedayhanbok.com
交通:乘地鐵 3號線忠武路站 8號出口步行約5分鐘
備註:想著粉紅色韓服,記得早30分鐘去排隊