高學歷畢業人士選擇躺平：咁辛苦為乜 最緊要開心

一名自稱香港三大畢業及雙海外碩士的網民分享自己高學歷的生活，言談之間認為香港的社會上的競爭太大，寧願悠然地生活，她直指：「咁辛苦日日飲兩枝 redbull monster 為乜」。

日打兩份頹工不知幾開心

該名網民分享自己現時會打兩份工，現時任職保安及便利店店務員來維持生活，她會利用返工的時間睇數學書，平日又會編寫程序，閒時煲下劇，最大的煩惱是「要諗下一餐食咩 」，認為現時的生活「不知幾開心」！

躺平原因：豐富自己人生

該名網民解釋之所以會躺平是她認為：「努力完買唔到樓，做生意又畀唔起租，不知為了甚麽」、「結婚拍拖不了，我一日多咗好多時間睇書」、「養生做 gym 做瑜伽係多餘，活幾長命都無所謂，最重要活得自由瀟灑同開心」、「見到疫情啲生意佬搞到破產執笠，就明白努力得個桔不如一開始唔好努力」等。

網民 ：人生邊有model answer

其他網民認為沒有問題指：「人生邊有model answer，只要你開心就得，當然你偷呃拐騙就唔同講法」、「真，競爭大又輸起跑線，努力同成果完全唔符合效益」；又有正在躺平的網民分享：「而家低學歷躺平，hea工過日神」、「普通人普通大學畢業，失業兩年日日訓食，諗住用到啲錢差唔多就鬆腳轉生」等。

網民： 樓主吹水啦

看到事主的經歷，網民質疑指：「海外碩士唔使錢咩，而家打份工夠食夠住就得？學費點還？一係屋企有錢幫你交學費，一係吹水」；「喺香港stat, maths, cs咁搶手，請個intern都一萬，唔會無未來」等。