飲食篇｜頂級美食慘遭嫌棄 不如食平民餐廳
去旅行想帶父母食好嘢，往往換來一肚氣。有網民分享自己狠心碌卡預訂萬二蚊溫泉旅館，原以為可享受頂級A5和牛，點知老豆夾起牛肉竟狠批「淋劈劈無咬口，不如落街搵間吉野家食仲飽」。亦有苦主大呻，專登為屋企人預約精緻晚餐，結果老豆無論食乜都只係拋出一句「不外如是」，令事主感嘆老人家其實只想要一碗Food Court嘅熱湯麵。最慘係帶長輩去食當地人氣排隊美食，點知阿媽食咗兩啖就黑面話：「做乜帶我嚟食啲咁嘅垃圾」，真係聽到都心淡。
景點篇｜零濾鏡睇風景 富士山被貶為大帽山
長輩對觀光景點嘅評價亦經常令人啼笑皆非，完全打破後生仔嘅旅遊濾鏡。有網民無奈表示，喺零度低溫下企定定等睇河口湖富士山，結果母親毫無興致，更直接大踩：「其實同大帽山有咩分別，有咩好睇」。另一位網民就大呻帶父親同遊沖繩嘅慘痛經歷，老人家竟嫌棄當地環境太鄉下，財大氣粗咁發牢騷話：「我哋係咪嚟扶貧？」令事主大感無奈，直言自此之後唔敢再同對方出遊。
住宿購物篇｜嫌棄酒店房細 買手信狂攞淘寶比較
日本市區酒店普遍空間較小，呢點亦成為長輩嘅「發炮」位。有苦主千挑萬選book咗市區極方便嘅酒店，一推開房門阿媽就即刻發脾氣話：「間房咁細點住人，直頭好似狗竇咁！」完全無視地段嘅便利。去到買手信環節，當後生仔想買當地特產留念時，又會無端端被老人家掃興，有網民就分享兩老最愛嘅口頭禪係：「咁貴買件垃圾，淘寶廿蚊都有啦！」令原本開心Shopping嘅心情瞬間跌落谷底。
網民反思｜孝順變自我滿足 兩代旅遊需求大不同
面對呢堆激心金句，雖然網民群起抱怨，但亦有部分人提出反思。有留言指出，後生仔帶老人家去旅行，有時可能只係為咗滿足自己「盡孝」嘅儀式感，忽略咗長輩其實怕攰、怕凍、食唔慣生冷嘢。長輩對外國風景無濾鏡，自然覺得大同小異，甚至覺得全程留喺房瞓覺最舒服。其實不少兩老根本唔需要出國折騰，留喺香港行吓街、去酒樓舒舒服服飲餐茶，可能已經係最滿足嘅享受。
