【移民台灣】點解會揀移民台灣?點解會揀高雄?呢兩日收到好多朋友PM 里奧叔叔,問里奧當初點解會揀台灣?好怕台灣遲早會變成另一個香港,到時又要走一次。揀好台灣後,又點解會揀高雄?聽講高雄又熱,空氣又差 。更有人問台灣人對香港人觀感如何?及小朋友適應問題等。里奧都好明白大家近日嘅心情,移民始終係一生中其中一項大工程,今日就同大家分享一下里奧當初嘅諗法,希望唔會覺得里奧寫得太悶。

延伸閱讀:移民台灣生活費開支一覽 食費、交通、住屋、水電煤、上網、勞健保

撰文:移居台灣 真實生活|圖片來源:taiwan.net.tw

選擇移民台灣的原因

點解會揀台灣?坦白講,以里奧叔叔嘅條件,除咗台灣,唔知仲可以揀邊度。記得第一次踏足台灣係20年前,當時只係跟旅行團嚟玩咗7日,對於當時極年輕嘅里奧覺得台灣唔好玩,而且每個城市都感覺落後,所謂嘅夜市就只係擺地攤,簡單講就係唔鍾意去台灣,旅行就梗係去日本、泰國啦!

之後隔咗差唔多十幾年(移民前),喺里奧嫂嘅要求下,終於再次踏足台灣,呢次嘅感覺就產生咗好大變化。台灣雖然都係用中文,但文化就同香港及中國大陸完全唔一樣,就算用新加坡做比較,台灣畀到里奧嘅感覺好舒服,學秋生哥話齋,呼吸嘅空氣都甜啲(其實空氣質素有時候好差)。

里奧讀書時期去咗美國幾年,之後喺中國大陸工作又長駐咗幾年,就算當初對台灣嘅了解唔深,嗰種舒服嘅感覺就對里奧叔叔產生咗移民台灣嘅諗法。

圖片來源:taiwan.net.tw
圖片來源:taiwan.net.tw

咁對於當時里奧叔叔嚟講,台灣有咩好呢?

地理位置

近香港,里奧同里奧嫂雙親都喺香港,香港屋企如果有需要,我哋返去都好快就到,里奧試過由高雄家出門口起計到香港家門口,只係用咗4.5小時。

生活及飲食文化

生活及飲食文化接近,以前喺美國除咗去唐人街外,好難可以食到中餐,就算喺中國大陸嗰幾年,由於長駐喺四川嘅關係,日日食嘢又油又辣,雖然台灣都唔會同香港完全一樣,但起碼有好多選擇,飲食係生活一大問題,唔慣會好辛苦。

居住環境

居住環境舒適,里奧家喺香港都算蝸居一族,後期忍唔住搬去元朗租間大啲嘅屋仔住咗幾年,但香港樓價不斷上升,買唔到樓嘅里奧就好希望有一個安安樂樂嘅家,台灣好似可能有啲機會(不知哪來的自信)。

面對兩大問題

聽落好似幾好喎!不過有兩大問題要解決:

  1. 小朋友學業。當時里奧兩位千金年紀仲細,適應能力方面,里奧完全沒有擔心過。不過台灣教育以中文為主,以里奧個人角度嚟睇,英文就算唔叻,都最好唔會太差,咁喺台灣可以點解決呢?
  2. 搵食。香港始終係自己嘅地方,無論環境點變都好,一定搵到工作,但係台灣萬一做生意唔掂,會有公司請嗎?手上嘅資金又夠我生活幾耐?做生意環境又陌生,萬一失敗又點算?

就係咁,嗰次旅行之後返到香港就日日諗可行方案,除咗解決到小朋友嘅英語學校之外(私校),搵食呢方面都未有一個方向,甚至連做咩生意嘅idea 都未有。

里奧當時可能喺香港壓力太大嘅關係,而且加上雨傘運動,里奧覺得無論去到世界各地,只要努力融入社會,了解到當地文化,就算夜市開檔賣雞扒都應該可以生活到,加上抱住要走就趁早嘅心態,最後就決定走咗先講(里奧太衝動,這只是個人立場)。

延伸閱讀:【台灣升學懶人包】入學途徑、申請要求、大學學費、生活費預算、獎學金!

選擇高雄的原因

點解會揀高雄呢?天氣又熱空氣又差嗎?當初里奧係打算到台中,咁點解又會變咗係高雄呢?

當時聽講好多香港人選擇台中,而當時移民公司都建議里奧去台中,亦喺fb群無啦啦又有位居住台中多年嘅港人好熱心咁話幫我,又帶里奧家遊台中市,心態上會諗點解咁多人都話台中好嘅?

里奧家都覺得台中幾好,北上南下又方便,但可惜因為兩位千金嘅教育係里奧嫂嘅考慮重點,喺香港已經希望女兒就讀IB school 嘅里奧嫂都希望到台灣讀IB school,但在台中沒有IB小學,就係咁,我哋就再花時間去高雄考察一下。

到達高雄後,第一個感覺係城市規劃好整齊,呢次係里奧第二次踏足高雄,之前落後嘅感覺完全冇晒,但太陽就真係好鬼曬,空氣嘅感覺又唔覺比台中差好多,可能當時只係短短嘅幾日考察,但感覺都唔錯,加上里奧嫂睇完學校非常滿意(學費除外),最後我哋就決定以學校來決定居住地,落戶高雄。

圖片來源:taiwan.net.tw
圖片來源:taiwan.net.tw

台灣人歡迎香港人嗎?

里奧相信咩人都會有,不過,如果以里奧家呢五年嘅生活體驗,就從來未遇過嚴重嘅歧視,但偶然都會遇到有啲賴皮鬼扮晒嘢,通常呢啲賴皮鬼會喺你做錯嘢嘅時候出現,例如銀行手續上會有不清楚,賴皮鬼會話你哋香港人唔明,台灣人係咁做……blablabla。

但係生活上,里奧就完全未有過不愉快經歷,里奧家在地台灣朋友佔大多數,間中都會參加港人聚會,可能是接觸台灣人多的關係,慢慢都了解台灣文化,台灣人大部分都好容易相處,只要慢慢融入社會,生活上唔會有人覺得你「唔地道」,好快就會習慣。

眨眼間五年又過去,尋日晚餐時與大女分享最近香港嘅大新聞,12歲嘅佢似乎已經唔多關心香港,香港對於佢哋嚟講,只係一個出生地,儘管每次有大新聞里奧都會分享之外,佢哋兩姊妹已完全融入,認為自己係台妹,但作為父親嘅里奧叔叔,一直要佢哋明白「台灣是你們的家,香港是你們的鄉」,一生不變。

里奧叔叔

facebook:移居台灣 真實生活

免責聲明:本專頁刊載的所有移民資訊,只可作參考用途。讀者在作出決定前理應審慎,若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

延伸閱讀:

【移民台灣2020】5大方法移民台灣 申請門檻及資產一覽

選擇移民台灣原因 小朋友學業、搵食都需要考慮

11個了解台灣生活民情須知!仲要當兵?遇到的困難?

選擇移民台灣原因 小朋友學業、搵食都需要考慮