去旅行可能只係短短數天,但由搶機票、諗行程,到旅途上所有安排,真係少啲心機都搞唔掂。

好彩有個會Plan行程的女朋友


我必須承認,我係一個好鍾意去旅行,但又好懶嘅人…… 我唔單止懶得plan行程,就連上網訂機票、上唔同嘅網格價睇有咩優惠我都懶。簡單而言,就係「衰格」。

我知一定有人會話:「唓!咁你咪學人去旅行啦!」冇錯……不過我好幸運,因為我有一個會plan行程嘅女朋友!

一切由校鬧鐘起身搶機票開始

喺呢方面,佢簡直係我心目中嘅女神。平時佢會留意住邊度有特價機票,校定鬧鐘起身搶機票。

如果有幸搶到,就會立即打電話畀我叫我請假!

「喂喂喂!5月去韓國首爾!我搶到平機票!」

「咁我同公司請假啦!」

Plan行程可能係最辛苦,但最開心嘅工

因為佢一開始會plan定行程,不論係去過好多次嘅韓國,定係從未去過嘅國家,佢都會瘋狂搜集大堆資料,計劃一條用最少時間玩最多地方嘅旅遊路線。

其中我最佩服嘅,係上半年去嘅意大利加法國旅程。先由一開始羅馬,再去佛羅倫斯、比薩、威尼斯、最後一站巴黎再返香港……

嗰十幾日,好似跑完一場馬拉松一樣!「點解你可以搜集到咁多資料?唔辛苦咩?」我問。

「辛苦㗎!但我諗起兩個人可以去啲景點行街、影相、食嘢,我就好有動力去計劃行程㗎喇!」

早一個月已經執定行李

當行程搞掂晒,第一時間就係催促我執行李……

「我驚你漏帶嘢啊!我依家幫你執!」明明仲有成個月時間,硬係要預早幫我執定行李。

女朋友嘅唯一弱點

要講唯一一個女朋友嘅弱點,就係佢唔識計凌晨機嘅日期。例如1月1日嘅凌晨機兩點,到底係1月1日夜晚先去機場,定係12月31日要去機場呢?

唔知點解,次次佢都錯……

講到尾,佢都只係鍾意……

不過,我真係好慶幸女朋友會負責plan行程,佢唔係「擅長」,亦唔係「鍾意」plan……佢鍾意嘅只係同我去旅行時嘅開心。