新鞋刮腳 ?相信唔少人都試過!最簡單嘅解決方法,當然就係貼膠布啦!但係行行下,塊膠布好易甩!新鞋最容易刮腳的地方,一個是腳踭位,一個是腳趾公外側位。以下幾個令新鞋唔刮腳嘅方法,大家不妨參考 下!
撰文:Jac | 圖片來源:新傳媒圖片庫(原文刊於《 Sunday Kiss》

5招對付新鞋刮腳

01 |  濕毛巾+風筒

風筒除咗用嚟吹頭外,原來重係可以整軟鞋踭嘅秘密工具!只要用濕毛巾濕濕鞋踭位,再用風筒吹出嚟嘅熱風向刮腳位置吹幾分鐘。然後用手按住刮腳位,咁就得喇!

除咗風筒,大家都可以用濕毛巾加槌仔、濕毛巾加鞋撐!首先都係用濕毛巾濕 濕鞋踭位,槌仔就可以打下刮腳位,而鞋撐就係用嚟撐大對鞋!

02 | 報紙+膠袋

唔好以為報紙污糟就冇用呀!只要將報紙濕少少水,揸埋一團,再用乾報紙包住濕咗嘅報紙,塞喺刮腳位,再將對鞋放入膠袋,過夜之後,攞番出嚟就得喇!

03 | 番梘或凡士林

著新鞋之前,可以用番梘或凡士林,喺同腳踭接觸最多嘅部分輕輕抹一層,鞋踭位就會變得光滑,唔會刮腳了!

04 | 白酒+毛巾

見到白酒唔好以為只可以用嚟飲,佢都可以幫到你對鞋! 方法好簡單,用毛巾浸少少白酒,再用夾夾住條毛巾喺刮腳位,又係一晚就已經可以搞掂晒!

05 | 護跟貼

如果你好懶,以上4樣都唔想做!咁你就買對護跟貼啦!只要貼佢喺鞋踭位,唔畀自己腳踭同鞋踭接觸,咁就唔會刮腳啦!