每年9月至4月是出發睇極光的旺季,無論你揀去睇極光圓夢嘅地點係芬蘭、挪威、冰島定俄羅斯,都想影張靚相留念。不過一般人就未必掌握到極光攝影技巧,今次就等出發吧|旅魔頭分享經驗之談。

圖文授權:出發吧|旅魔頭

01 | 器材裝備

  1. 腳架是必需的!但買普通三腳架就得,我嗰支都係鴨寮街百幾蚊貨色。
  2. 有手動功能的相機一部,唔一定要係單反㗎!能夠手動調校光圈快門iSO、M Mode就可以。
  3. 保暖裝備,除咗個人要保暖,相機都要保暖,因為天氣凍,佢好快就會冇電,溫度太低時,可以幫佢笠個膠袋,或貼個暖貼。
  4. 電筒一支,唔建議用電話,因為你部電話會好快冇電,太凍,iPhone亦會暈低!
  5. 以廣角鏡為佳,愈wide就影到愈多(我用10-24mm),光圈愈大愈好。
  6. 備用電池,因為寒冷低溫下,電池耗電超快,玩一陣就冇電。

02 | 相機設定

出發前,先要熟悉自己部相機,啲掣點撳,因為有時極光爆發只係一瞬間,而且當下環境黑,唔熟啲掣,就會搞好耐都未影到,所以可以在香港練習下影星空先,方法大致上一樣!

  1. 關閉防手震。
  2. 關閉降噪功能。
  3. 如果冇快門線,就設定倒數幾秒後,先再拍攝,以免撳掣嗰下郁到而令相片變得模糊。
  4. 用手動mode(M Mode)進行拍攝。
  5. 感光度iSO 800(iSO 800-iSO 3,200,視乎相機同埋極光活躍程度,我自己嗰部機就1,600係極限,我通常都係iSO 800)。
  6. 快門設定:視乎當時極光明顯程度而設定(5-30秒),愈活躍就愈短時間都得,kp5嗰日大概都係5至10秒一張,但kp2要25-30秒先可以影得明顯綠光。
  7. 光圈設定:最大光圈。
  8. 對焦:要使用手動對焦,先將鏡頭調成無限遠(infinity),再手動操作,慢慢扭回少少焦距,每次1mm,多次嘗試,直至放大睇畫面清晰為止,記得放大睇係清晰先!

03 | 簡易人像極光合照補光技術

按下快門等候倒數之後就開始拍照,無論快門速度係5-30秒,人要企定,未影完之前都唔可以行開。

然後用電筒照一下個人(1秒左右)就熄燈,繼續企定等待餘下嘅快門時間直至影完一張,咁個人就會光。睇一睇效果,如果個人過度曝光就照電筒嗰下再短啲時間,如果個人太黑就照耐少少。有時影30秒定格會好攰,最重要就係照電筒嗰秒千祈唔好郁,唔照住嗰陣,少少郁都仲可以接受嘅。

04 | 注意事項

  1. 運氣好遇上極光爆發,光移動速度較快,就需要縮短快門速度,減iSO 。
  2. 拍攝背景及道具:冇背景剩係影天冇咁好睇,所以一般極光前景可以影森林、帳篷、湖、馬路、車、屋等等。湖有倒影都係一個好好嘅選擇!避開光源,盡量減低光害。可以手持小電筒或者LED道具燈,效果唔錯。
  3. 盡量避免拍照途中將相機攞入室內,一冷一熱,鏡頭會起霧,有排都唔散。

05 | 後製

後製執相都好重要,可以用iPhone內置相片編輯,提高光暗亮度及顏色,極光效果即刻明顯好多。整體來講,其實影出嚟嘅效果一定會比你親眼目睹嘅好,因為相機可以拉長曝光時間!

大家都唔好太執著影唔影到,尤其大爆發一刻,最緊要自己用眼睇咗先!影唔影到都係其次,享受當下,睇咗,入咗自己個腦先最重要。

下一頁:一生人要睇一次|極光旅行 禦寒衣著穿搭+裝備6大貼士