又到咗新年,仲記得以前細個新年好開心,可以收利是錢、同表兄弟姊妹玩,仲可以瘋狂食瑞士糖。新年亦係我人生第一次感覺到呢個世界原來充滿謊言,就係父母會話幫你儲埋啲利是錢,將來會畀番我。但到我大個咗,發現阿媽一早就拆晒啲利是錢,用嚟買我嘅生日禮物。

圖:電影截圖、新傳媒圖片庫

角色轉換,首年「收利是」變「派利是」

今年有少少特別,係我剛剛由「收利是」變成「派利是」嘅第一年。預早去銀行兌錢準備入利是封,回想起我以前收利是,其實同打工仔一樣。

你要哄得班親戚高高興興,先可以有利是收。細個親戚會叫你嗌人,講十句恭賀說話先畀利是。

派利是
最緊要哄得班親戚高高興興!(圖片來源:《富貴再迫人》截圖)

拜年可以體驗社會的殘酷

長大咗,就會裝作「朋友」嘅口吻,但一副長輩姿態去審問你,返咩工?有冇拍拖?幾時結婚?雖然問題好無聊,但你絕對唔可以串佢哋,因為佢哋係你長輩,更重要嘅係佢畀錢你!你都唔會串你老闆啦係咪?

派利是
(圖片來源:《大富之家》截圖)

到咗今日,輪到我變成派利是嘅「長輩」,雖然冇乜做長輩嘅感覺,但腦海中不斷盤算緊,應該問咩問題令啲細路難堪呢?

我咁做只係想佢哋體驗社會嘅殘酷,老闆嘅要求不論有幾無聊,你都要笑臉迎人咁答佢。

派利是
拜年就是要討人歡心。(圖片來源:《我要做Model》截圖)

拜年時與小朋友一起聊天說笑

但結果,我都係冇咁做到……
當我到達親戚屋企,細路已經玩到癲晒,我冇叫佢哋停止玩樂,過嚟排隊攞利是。相反我走過去,逐個派兩封利是,同佢哋傾兩句偈。

派利是
有幾多長輩會一齊同班細路打打鬧鬧?(圖片來源:《愛.回家》截圖)

「點啊?最近有冇屠龍?咩話!老竇唔肯買碟畀你?!我share畀你玩啦!」
「喺學校有冇收兵啊?咩話!你養隻青蛙又離家出走?放心啦!你將來個男朋友都差不多。」

「呃……你咁細個,連企都未企得穩,我諗你啲利是錢都係被父母吞晒。」我摸一摸表哥剛剛出世嘅BB女個頭,嘆一口氣將封利是畀表哥。

不要成為自己討厭的長輩

親戚笑我唔識派利是,做長輩嘅應該教識小朋友咩叫尊重。或者喺佢哋眼中,我永遠都係一個應該要虐待嘅小朋友。

但我唔想成為自己討厭嘅長輩。就喺搭車去拜年嗰時,我諗起一句說話。

「原來當一個人擁有權力時,你就會變成喺你冇權時所討厭嘅人。」

派利是
長大了,不要成為自己曾經討厭的人。(圖片來源:《家有喜事》截圖)

下一頁:為咗討論年初一去邊個屋企拜年,同老婆鬧交

Tags :