澳門百老匯最近組織咗一條「火鍋街」,趁天氣又凍番少少,好想過大海打番個熱辣辣嘅邊爐啊!火鍋街每間店都有一款推介,今次嚴選8款特色邊爐煲仔菜,準備去澳門玩,值得參考一下!

text: Ellissa | photo: Fion、 Galaxy Macau

澳門火鍋街:01 | 古法炭爐 街邊吃燜羊腩煲

首先推介李家菜古法燜羊腩煲,只在秋冬限定供應!凍冰冰想暖胃就最啱,記者訪問經理嘅時候,佢仲話熱辣辣嘅羊腩煲平均一日可以賣到70個!無論係夜晚定係晏晝都好多人幫襯!首間李家菜2000年喺十月初五街開設,至今有17年歷史。主打懷舊氣氛同宵夜,受到澳門人熱愛。

而且呢個羊腩煲特別之處係用咗炭火嚟打邊爐,所以會特別惹味,一大班朋友圍住個爐暖笠笠咁吹水,簡直就係人生一大樂事啊!

李家菜
營業時間:12:00nn-3:00pm,5:00pm-1:00am
地址:百老匯美食街,E-G028

02 | 香噴噴 花雕醉雞鍋

皇冠小館主打花雕醉雞鍋,打邊爐食番個嫩滑嘅醉雞鍋就啱晒啦!清新嘅花雕味在湯底裡面滲透出嚟,大大隻新鮮雞加埋藥材配料,好味又養生!

經理話畀我知,湯底加入好幾種中藥材配料,藥味十足,放入雞件之後等8分鐘,呢個時候嘅雞肉最嫩滑,就啱啱好可以食喇!

皇冠小館
營業時間:11:00am-12:00mn
地址:百老匯美食街,A-G017

03 | 70年秘方 秘製牛雜蘿蔔鍋

梓記牛什喺澳門有幾出名相信大家都知道,百老匯原來都開咗分店,同樣有驚喜!此店的牛雜用上超過70年嘅秘方炮製,牛雜蘿蔔鍋裡面嘅牛雜同蘿蔔都燜得好腍又入味,如果食得辣,記得點埋秘製辣椒油,超讚啊!

梓記牛什
營業時間:11:00am-1:00am
地址:百老匯美食街,E-G026

04 | 葡式秘製咖喱蟹

去澳門想食葡國菜?福龍葡國餐主打正宗葡國菜,秘製咖喱蟹就係佢哋為火鍋街而預備嘅煲仔菜式!鮮甜大隻嘅蟹配上咖喱汁,配飯吃一流,睇見都流晒口水!

福龍葡國餐
營業時間:12:00nn-3:00pm,6:00pm-11:00pm
地址:百老匯美食街,A-G005-G009

05 | 鮮味豬雜粥底火鍋

新馬路成記粥品嘅豬雜粥底火鍋,用咗招牌又綿又滑粥底,加埋豬雜等嘅配料打邊爐,之後仲可以食埋個粥,一定夠晒飽!

新馬路成記粥品
營業時間:11:00am-1:00am
地址:百老匯美食街,E-G025

06 | 日式shabu shabu 豐盛海鮮鍋

食厭咗中式火鍋,想轉新口味?可以試下日式shabu shabu!千笹日本料理嘅熊本黑大豆辛辣味噌海鮮鍋,濃郁嘅湯底,加上各種各樣嘅海鮮,真係鮮味十足啊!

千笹日本料理
營業時間:12:00nn-3:00pm,6:00pm-11:00pm
地址:百老匯美食街,A-G018, A-1001

07 | 香辣暖胃 正宗重慶麻辣雞煲

重慶麻辣雞煲一向都係港人最愛,巴山酸辣粉就可以食得到!來自四川嘅師傅特別炮製咗自家麻辣醬料,將雞肉同多種香料一齊爆炒,食完仲可以加湯打邊爐!

巴山酸辣粉
營業時間:11:00am-12:00mn
地址:百老匯美食街,A-G019

08 | 惹味台式三杯雞煲

唔想打邊爐又想食熱辣辣嘅嘢?煲仔菜就啱晒你喇!百老匯嘅度小月有款台式三杯雞煲,食落好香嘅九層塔味,雞肉嫩滑甜甜哋,一試難忘。

度小月
營業時間:11:00am-12:00mn
地址:百老匯美食街,A-G014-16

 

延伸閱讀:開幕直擊!澳門teamLab展覽 5大打卡熱點+購票攻略