雪之國北海道一年一度嘅盛事-「第67屆札幌雪祭」終於係下個月正式開幕啦!!呢個只要講起日本雪祭就會立即諗起佢嘅札幌雪祭,舊年總共吸引約240萬嘅觀光客參加過,相信哈日嘅你絕對唔會覺得陌生~今年度繼續有超過200座以上嘅冰雕同雪雕一齊隆重登場,而備受注目同今屆嘅重點亦都陸續公佈啦!仲唔即刻做定功課?

s_top

係札幌雪祭入面都會分雪雕同冰雕,兩者各有特色,而且仲好識點題,好跟足潮流架。

sapporo_fest_snow
今年最具話題,就係繼去年星戰 黑武士雪雕後,出現《進擊的巨人》和《龍珠超》動漫雪雕!

【大冰雕系列】

1. 北海道新幹線通車

係大通會場二丁目嘅道新冰之廣場將會座立以「連繫」為題目嘅北海道新幹線通車嘅冰雕。換言之就係慶祝再過多3個月就通車嘅北海道新幹線。而係新幹線列車背後嘅襯托都係重點所在,全部都係新幹線線路會行駛嘅人氣觀光景點:函館嘅五稜郭跡、金森紅磚倉庫、青森市最具代表嘅睡魔祭、弘前市嘅弘前城、八戶市嘅豐收祭等等。將所有連繫起來就係我地將會睇到嘅北海道新幹線啦~

01

2. 台灣女王頭及平溪派出所

繼續係大通會場五丁目嘅每日冰之廣場,繼上年嘅台北天行宮,今年接力嘅係都具有代表性嘅地標野柳女王頭同平溪派出所粉墨登場!原來今次已經係第五年台灣駐日代表及每日新聞共同合作~而且最特別嘅係喺展出期間每日嘅下午4點至7點,每30分鐘就會有亮燈活動,之後仲可以將寫好嘅願望同平溪天燈一齊飛上夜空添!

02

 

【大雪雕系列】

3. 札幌冬物語

位於大通會場五丁目東就係以莎士比亞嘅「冬物語」為主題。大會以當時係倫敦上演「冬物語」嘅劇場為概念,用雪雕去呈現當時嘅圓形劇場同藍天嘅天花板。而係雪祭期間,係呢個舞台上都係上演名為「札幌冬物語」嘅15分鐘短劇,千祈唔好錯過呀!

03_02

 

4. 2016年3月26日開業!北海道新幹線

北海道新幹線通車對日本人嚟講真係一件大事嚟架!除左頭先嘅冰雕就連雪雕作品都有佢嘅登場~但唔好以為冇咩特別,其實呢個雪造嘅新幹線係以實物大來製作架!成個大雪雕足足高10米、長20米、闊17米,使用嘅雪量足足有成1,300噸嘅雪!可見真係好隆重其事。

04_02

下一頁:巨人踩場,連澳門大三巴都有?

5. 進擊的巨人,殺到札幌!

相信大家都對喺國際有超高人氣嘅日本漫畫「進擊的巨人」唔會陌生,今年佢地正式嚟札幌踩場啦!今次超大型巨人會設定為破壞札幌,包括代表地標北海道紅磚辦公樓同札幌時計台,而巨大化嘅主角艾倫亦都迎面作出抵抗。點樣用雪雕去表現出壓倒性嘅現場感,絕對係不容錯過嘅作品之一。

05_02

 

6. 悟空都嚟埋!龍珠動畫30周年!

唔經唔覺我地童年嘅集體回憶之一龍珠(動畫)都已經邁向30周年。以作宣傳同慶祝新作「Dragon ball SUPER」今年係大通十丁目會場佇立大雪雕。主角悟空同比達是一定要的吧~另外仲有主要奸角破壞神比魯斯同破壞神象帕齊齊登場,龍珠的粉絲們仲等咩野?

06_02

 

7. 澳門聖保羅大教堂遺址(大三巴牌坊)

咦係咪好有親切感呢?無錯,今年喺HBC國際親善廣場登場嘅就係澳門地標-大三巴牌坊。大會會運用約464台嘅運雪車嚟製造出呢個高達17米、橫26米、深18米嘅雪雕牌坊。牌坊上充滿聖母像及不同嘅浮雕,試想像如何用雪嚟表現一定難度極高。真係好想立即去大三巴牌坊打返個卡,但當然係雪製嘅呢個啦!

07_02

下一頁:除左睇冰雕仲有咩玩?雪之樂園4大注目點

國際雪像競賽會

除左頭先所講嘅今屆注目嘅雪冰雕,係大通會場嘅十一丁目(國際會場)其實仲舉辦「第43屆國際雪像競賽會」,顧名思義就係來至世界各地嘅代表會來到會場進行雪像嘅比賽同交流,由2月4日開始為期5日。呢個競賽會中香港係過往幾屆都曾奪優勝,今年雖然未有我地香港嘅代表,但都有澳門參加比賽架~一齊嚟支持下啦!

13

第34屆國際雪像競賽會
【地點】
大通西11丁目 國際會場
【舉辦日期】2/4~2/8

 

TSUDOME會場,兒童遊樂園

睇完雪冰雕凍凍地,不如去運動暖下身子好嗎?位於TSUDOME會場其實係一個大人同細路都啱玩嘅雪之樂園。呢度提供咗各種用雪做嘅滑梯同滑雪遊艇等遊樂設施,一齊全情投入雪之祭典!而且場內仲有休息區同飲食區,玩得攰都俾你抖下氣~入面有咩玩?即睇4大注目玩意!

67tsudome-image

 

注目一:雪之長滑梯

坐上雪地專用嘅浮波上從高10米及長100米嘅雪之滑梯衝落嚟,大人細路見到都話正呀!

15

 

注目二:冰之滑梯

比起頭先嘅滑雪遊艇,呢個更係為小朋友而設。高5米,長12米嘅小形滑梯,相信你嘅小朋友一定樂而忘返!

16

注目三:滑雪遊艇

坐係遊艇上被拉住疾走嘅感覺,就算唔識滑雪都可以感受到呀!

17

注目四:雪之迷宮

小小用雪做嘅迷宮,大人可能唔啱玩但包保小朋友行到唔想停~

18

其餘仲有竹子滑雪、冰上滾軸溜冰,另外仲有新增嘅雪上公園哥爾夫、雪祭CAFE、雪單車等等,真係一日又邊夠玩?

 

第67屆札幌雪祭
【地點】(分三個會場)
—大通會場:大通公園1~12丁目
—TSUDOME會場:札幌市體育交流設施COMMUNITY DOME
—薄野會場:南4條通~南6條通的西4丁目線市道

【舉辦日期及時間】
—大通會場及薄野會場:2/5~2/11   (點燈到10:00pm)
—TSUDOME會場:2/5~2/18    (每日9:00am~5:00pm)

【交通】
—大通會場:從地下鐵『さっぽろ站』乘坐地下鐵南北線或地下鐵東豐線到『大通站』下車
—薄野會場:從地下鐵『さっぽろ站』乘坐地下鐵南北線到『すすきの站』下車
—TSUDOME會場:從地下鐵『さっぽろ站』乘坐地下鐵東豐線到『栄町站』下車,2號出口徒步15分鐘或舉辦其間有 Shuttle bus 接送

【官方網頁】http://www.snowfes.com/

 

延伸閱讀:

人生必遊!北海道5大絕景推介

冬季限定!嚴選2016年日本10大雪祭