【預防中暑食物】呢個夏天,多個地方都持續超熱天氣,除咗「中暑」之外,日文中仲有一個稱為「夏バテ」嘅夏日常見病症。睇睇自己有冇中招,同埋要點樣預防啦!

撰文:Carmen|圖片來源:日テレNEWS24

「夏バテ」即係⋯⋯

以中文解釋嘅話,即係「因夏天而產生嘅倦怠」,身體裡嘅自律神經未適應夏天嘅炎熱,而產生全身疲累、思考力低、冇胃口、失眠等徵狀。呢個係中暑前嘅症狀嚟,唔好以為好小事而大意呀!

天氣炎熱,大部分人都會選擇開冷氣,室內、外溫差大,令自律神經混亂。而且夏日飲凍飲嘅機會增加,雖然可有效令身體溫度下降,但寒冷同時令腸胃機能降低,因為內臟中嘅酵素活動減慢咗。

有效改善症狀嘅食物

如果覺得自己出現咗呢啲症狀,可以嘗試食多啲維他命B豐富嘅食物,如:豬肉、鰻魚等,或可提升食慾嘅咖喱、泡菜都能有效減輕症狀。至於係咪真係少少凍嘢都唔飲得呢?醫學博士就話含蛋白質、脂肪嘅雪糕係可以食嘅,但刨冰呢,就因為幾乎係完全冇營養,所以對症狀係冇改善作用嘅。

冷氣就最好校到27~28度,溫度唔好太凍,而且重要嘅係濕度調校!濕氣重嘅環境會搞到好悶熱。如果有得浸浴嘅話,水溫最好調校至38~40度。可避免因高溫中暑之餘,能夠令身體得到放鬆,有效調整自律神經,紓緩病症。

今年實在熱得太恐怖,要小心食慾不振等身體問題症狀,同埋小心脫水症狀導致中暑!

Tags :