【家居清潔】屋企係每日都會接觸同長時間逗留嘅地方,每日開門閂門都吹入咗唔少塵埃污跡,再加埋啲家具用得多都會日漸泛黃、污糟。今次日本家居清潔達人教大家點樣可以輕鬆又有效咁去除家居污跡!

撰文:Carmen|圖片來源:《LDK》

1|微波爐油污+焦痕

只係用洗潔精+水咁擦拭,係唔可以洗清晒啲油污同焦痕嘅!首先要將表層嘅油污去除。

步驟一:將浸有清潔劑嘅抹布叮熱

用水溶開清潔劑,然後浸入抹布。當清潔劑水滲透後,就輕輕扭乾抹布,然後直接用微波爐加熱1分鐘。

步驟二:用溫熱抹布拭去油污

用經微波爐加熱嘅抹布拭去油污。然後用水擦拭爐嘅內壁,直至完全冇晒泡沫。

步驟三:輕輕擦拭焦痕

用百潔布等嘅海綿工具擦去污跡。較頑固嘅污跡可加添去污粉等擦拭清潔。

2|貼紙痕

貼喺家具上嘅貼紙,撕除時如果清潔得唔徹底,就會留下黏膩膩嘅痕跡!仲會搞到黏住咗好多灰塵,非常難搞!

步驟一:喺貼紙痕上塗上清潔劑

喺黏膩膩嘅貼紙痕上塗上食器用嘅清潔劑,用紙巾等將清潔劑滲進痕跡裡,然後防止更多清潔劑流下。

步驟二:封上保鮮紙30分鐘

塗上清潔劑後,用保鮮紙密封30分鐘。封上保鮮紙可以令貼紙痕軟化。

步驟三:用水抹乾淨後,再用乾布拭乾

30分鐘後,用濕咗水嘅抹布擦去痕跡。抹好後,最後再用乾布抹乾。

小貼士:用保鮮紙密封30分鐘,可令食器用清潔劑中所含有嘅界面活性劑發揮更大作用,將貼紙痕嘅污跡浮起,使污跡更容易可以抹走。

3|吊燈燈罩污跡

有時有蟲飛入,又有塵埃飄入,不知不覺間,就積咗好多污跡,令到房間燈光變暗,好麻煩!

步驟一:吸走燈罩內污物

用吸塵機吸走積聚喺燈罩內嘅污物。如果污物黏實咗,可用性質較溫和嘅清潔劑將污物軟化後再取走。

步驟二:用浸有柔順劑嘅抹布擦拭

以500ml清水對1滴柔順劑嘅比例稀釋,然後用抹布或廚房紙沾上混合液後,再擦拭燈罩。

小貼士:清潔好後,最後用沾有柔順劑嘅抹布擦拭,可起到保護膜作用,減少摩擦,令塵埃難以黏上。