【築地市場搬遷】東京築地市場搬遷一事,由2016年開始商討,最後決定今年10月就會遷移到江東區嘅豐洲市場。離別在即,唔少觀光客都想把握最後時光前往參觀「築地名物」,吞拿魚拍賣。官方更新咗相關資料,記得mark番低,唔好錯過喇!

撰文:Naka|圖片來源:新傳媒資料室、網絡

築地市場搬遷 9月15日終止參觀拍賣

為咗準備遷往江東區豐洲市場,築地市場宣布,一直極受外國觀光客歡迎嘅吞拿魚拍賣參觀活動,將於9月15日終止。

喺吞拿魚卸貨場內舉行嘅拍賣會參觀,除咗休息日之外,幾乎每日都會舉行。隨住外國觀光客人數增加,於2011年開始,每日限制最早到達嘅頭120人先可以參觀拍賣。

另一方面,吞拿魚卸貨場以外嘅水產・青果仲卸貨場嘅參觀則繼續至9月29日。

築地市場內場將於10月6日結束營業,然後同月11日於豐洲市場開業。場外市場則不受影響,繼續於築地原址營業。但場內市場遷移後,場外市場是否繼續沿用現時名稱,就尚是未知之數。