去激安「驚安の殿堂」除咗可以瘋狂掃貨,仲可以自製指定人名印章,唔單止唔使識日文,仲好快就搞掂,價錢又唔貴,最啱做手信啦!以後去日本旅行買手信唔使再頭痕,畀同事可以買一大盒零食帶返公司share,而熟啲嘅朋友,甚至係男女朋友,送上自己DIY獨一無二的手信,收到的話一定會好開心!

文:Cynthia|圖:Fion

大阪道頓堀「激安」實試 自製名字印章機

自動販賣機在日本四圍都係,幾乎咩都有得賣,而位於大阪道頓堀的激安の殿堂入面有部自製人名印章機,其實都唔算係新嘢,但好多人每次經過,見到成堆日文字就一秒棄權,覺得一定好麻煩好難搞,原來係唔識日文,想整都唔太難!今次由唔識日文嘅記者,逐步示範下要點做啦!

初階玩法:自製英文名印章

如果唔識日文,可以簡簡單單地整個英文名的印章,成個流程都唔算複雜㗎!

英文名印章步驟1:選擇字體排列方式

一開始按完幾次了解之後,就會正式進入製作過程,首先要揀選字款排列方式,有8款供選擇,單行雙行、打直打橫、有冇公仔等等,只要看圖片的範本,挑選自己喜歡的排列方式,即可按「決定」。

英文名印章步驟2:輸入文字

如果一開始顯示了日文輸入法的話,可以按左下「英數」的設定,可以自動變成輸入英文了!除此之外,還可以挑選印章上的花紋,選擇非常多,可以慢慢看!

英文名印章步驟3:決定字體

按完「決定」進入決定字體的環節,有不同的書寫體供選擇,同樣也是單看圖片可以看出分別,不用擔心看不明日文。下一步就是決定文字的粗度,1最幼,5最粗,圖片提醒如果筆畫太多又選太粗體的話,字的筆畫有可能黐在一起變得太模糊,可以透過預覽來決定。

英文名印章步驟4:揀選印章材質

再下一步是決定印章的材質了,選擇多達14種,最平的只需500円,也就是說約HK$35就可以整到個印章做手信!想整得再靚啲,都有其他款畀你揀,可以每一個睇預覽再慢慢決定!

英文名印章步驟5:揀選印章套

整完印章冇印台,就會用唔到。呢部機器同時有埋印章套發售,入面有一小格印台裝紅色印泥好方便!印章盒一共有4款畀你揀,如果想單純整個印仔,可以慳番!

英文名印章步驟6:畀錢、等貨!

最後一個步驟,就係畀錢等成品。如果有買印章套的話,會馬上先出套,印章要再等等,一般要10-20分鐘不等,等待期間螢幕上會顯示印章會慢慢成形的過程,望住都幾治癒!

英文名印章步驟7:完成!

等大約10-20分鐘,印章就會完成!印章同自己設計的一模一樣,而且質感也不錯,好適合做手信!

進階玩法:製作日文假名印章

如果你識日文的話,一切變得冇難度了!可以試試製作日文的印章,做法跟之前的一樣,就算只是簡單的名字,都已經好有心意!

高階玩法:爆趣中文印章製作

除了日文、英文,識得日文輸入法亦可以製作獨特的漢字印章。不過要留意,一定要用日文的拼音法,先可以成功顯示漢字,如果你唔識日文的話,就無法做到了!

爆笑玩法:英文名變漢字

如果你想試試自己嘅英文名會變成咩日文漢字,可以直接選英文version,再打自己嘅英文名。記者輸入咗常見姓氏「WONG」,可以出到「溫紅」、「雲俱」、「云弘」;再試試日本組合名稱ARASHI同AKB,出來嘅漢字都相當奇怪好笑!大家都不妨試試,睇下自己個名會出現咩搞笑漢字啦!