【樽裝飲品細菌】喺高溫尚未消退嘅夏天,要頻繁地攝取水分,預防中暑,樽裝飲品係一個方便嘅選擇。但最近,喺日本Twitter上,就出現咗「飲用樽裝麥茶後食物中毒」嘅問題。更可怕嘅係,原來唔止食物中毒,飲樽裝飲品,更分分鐘會導致骨折同視力減弱!

撰文:Carmen|圖片來源:Yahoo! news JAPAN、網絡

樽裝飲品貼嘴飲有幾危險?

日本內閣府,食品安全委員會嘅資料(2017年5月)指出:「不推薦再飲用曾經貼嘴飲過嘅樽裝飲品。」貼下嘴唇啫,有冇咁嚴重?!

食品安全委員會解釋,樽裝飲品一旦開封,樽內細菌就會開始繁殖。為咗防止飲大量細菌落肚,盡量一次過飲晒成支,如果一定要分開幾次飲嘅,最好倒落杯度飲。不過唔止貼嘴飲嘅時候,其實就咁倒落杯度飲,再扭番個蓋,都會有細菌走入飲品中。

福岡市保健環境研究所嘅實驗報告指,曾貼嘴飲過嘅樽裝麥茶中嘅細菌,喺常溫環境下增加咗100倍以上!報告更指出,喺氣溫30℃左右嘅狀態下,細菌更容易繁殖,夏季必須更加小心注意。

微生物會令樽身爆炸

除咗衛生層面嘅問題,由口進入到飲品中嘅微生物,更曾有令膠樽破損嘅事例。

由於微生物(特別係酵母)增加,二酸化碳素令樽內壓力上升,而有機會令樽身「炸開」!

日本國民生活中心就曾經收到過,因為膠樽樽身破裂而導致骨折及眼睛受損嘅事例。

一個年約80歲嘅女性,飲剩半支有汽飲品,扭上蓋後喺常溫狀態下放置咗近一個月,然後膠樽突然「炸開」。先撞到左手手肘,然後直衝上天花板,再插進身體。最後因複雜性骨折同割傷,需入院做手術。

另一個十幾歲嘅女性,貼嘴飲用500ml膠樽裝嘅運動飲品後,喺扭上蓋嘅途中,樽蓋突然飛脫撞上眼,導致視力受損。

即使只喺放置兩、三日,都有唔少同類事故。唔止有機會引起食物中毒,發生類似意外都唔係冇可能嘅事!以後飲樽裝飲品記得盡快飲完,同埋盡可能離口飲啦!