【日本LAWSON】都市人日常生活都離唔開便利店,行過路過買支嘢飲、「口痕」買啲零食咬下嘅情況絕對唔少!日本便利店嘅炸雞有幾出色,大家又試過未呢?肉質鮮嫩,款式味道又多,可惜嘅係擺耐咗,外皮就變得唔夠脆。為咗唔好浪費食物,而又令客人食到最新鮮嘅炸雞,LAWSON嘅「炸雞機械人」登場喇!

撰文:yuri|圖片:newswitch、NTV NEWS 24

日本LAWSON導入「炸雞機械人」

天寒地凍,時不時都想食下嘢,就算唔餓,都想食啲熱辣辣嘅嘢暖下胃。日本LAWSON人氣小食之一嘅炸雞,最近開始有即叫即炸服務喇!而且只需等1分鐘,就有熱辣辣嘅新鮮炸雞食!

「炸雞機械人」12月10日起,登陸東京都品川區嘅TOC大崎店LAWSON,預計於12月11日至12月28日期間進行試用實驗。喺收銀處向店員落order後,就可以獲得一個專用紙盒。放入炸雞機之前,要先畀機器掃描紙盒背面嘅條碼,然後再放入機身內,等待1分鐘,就有新鮮炸雞食!

導入「炸雞機械人」後,唔止可以縮短店員嘅調理時間,而且可以畀顧客品嘗到新鮮熱辣嘅炸雞,仲有效解決浪費食物嘅問題!咁啱呢段期間去東京嘅朋友,就唔好錯過喇!