秋天想去旅行睇紅葉，可能好多人都會揀日本。如果唔想同紅葉擦肩而過，記得買機票前留意埋今年嘅紅葉預測。承載日本傳統文化嘅京都係一個古色古香嘅地方，而最佳賞楓期大約為11月中旬至12月上旬，今次就會介紹一下5個熱門地方睇日本紅葉，記得唔好錯過喇！
撰文：SY｜資料來源：清水寺、八瀬瑠璃光院、北野天滿宮、叡山電車、貴船神社、Instagram
01｜清水寺
講到京都嘅景點，一定會提到清水寺。清水寺係京都嘅象徵，而清水寺嘅紅葉更係人生必看嘅風景之一。喺晚上6時半點燈後，寺院中嘅紅葉真係好靚，甚至令人忘記自己身處何方。另外，清水寺「仁王門」喺四周紅葉襯托下，真係靚到似一幅畫，更係IG打卡熱點之一！
清水寺真係靚到似一幅畫
| 秋期預測 | 11月中至12月初 |
| 開放時間 | 6：00 – 18：00 |
| 地址 | 京都市東山区清水一丁目 |
| 交通 | 從JR京都站出，坐206、100號巴士至「五条坂」下車步行10分鐘 |
秋夜特別參拜活動
另外，清水寺喺每年春、夏、秋季會舉辦一年三次嘅夜間特別參觀活動，而今年嘅11月16日至12月1日期間，會舉行秋夜特別參拜活動。
秋夜特別參拜活動
| 日期 | 11月16日至12月1日 |
| 特別參拜活動時間 | 17：30 – 21：00 |
| 網址 | www.kiyomizudera.or.jp/ |
02｜八瀬瑠璃光院
就算冇睇過八瀬瑠璃光院，應該都會見過琉璃光院嘅紅葉窗景。一望出窗，見到傳統日式庭園建築加上美麗嘅紅葉，只能用「世外桃源」來形容呢種迷人景致。靜靜坐喺室內，望住窗外絕景，時間好似靜止一樣。
靚到好似一幅畫
秋季特別拜觀
另外，八瀬瑠璃光院每年只對外開放2次，並唔係日日開放，所以大家如果要去，就要留意秋季特別拜觀嘅時間。
| 開放日期 | 10月1日至12月10日 |
| 開放時間 | 10：00 – 17：00 |
| 地址 | 京都府京都市左京区上高野东山55 |
| 交通 | 從「出町柳駅」出發，搭乘叡山電車，於終點站「八瀬比叡山口駅」下車，步行5分鐘 |
| 網址 | rurikoin.komyoji.com/lp/cn/ |
03｜北野天滿宮
喺充滿古色古香嘅京都，如果要睇紅葉，一定唔少得北野天滿宮！北野天滿宮係歷史最悠久嘅賞楓景點之一，入面嘅「紅葉苑」，有300多株紅葉；而「鶯橋」更係一個打卡好地方，橋下小河灑滿紅葉，真係唔捨得走！
北野天滿宮
| 平日開放時間 | 5:00至18:00 （4月 – 9月），5:30至17:30（10月 – 3月） |
| 地址 | 京都府京都市上京区馬喰町 |
| 交通 | 從JR京都站搭乘市內巴士50或101路線，至北野天滿宮前下車 |
| 網址 | kitanotenmangu.or.jp/ |
紅葉苑亮燈
每年秋季，神社「紅葉苑」會開放，遊客可以進入紅葉苑，嘆住茶欣賞紅葉。
北野天滿宮
| 日期 | 請到官網查詢 |
| 時間 | 日落至20：00 |
04｜叡山電車紅葉隧道
叡山電車紅葉隧道係IG打卡必去嘅地方，更加係行程中唔可以錯過嘅景點！好多人去貴船神社或鞍馬寺，都會搭叡山電車，而喺乘車期間會經過紅葉隧道，真係好靚呀！大家去嘅時候，記得要坐展望列車KIRARA，因為呢班車會採用大片景觀玻璃，觀賞紅葉嘅效果會更好。
叡山電車紅葉隧道
特別點燈活動
另外，如果想喺入夜後睇到不一樣嘅紅葉，大家都要留意㪫山電車沿線路段嘅點燈活動，唔係日日都有㗎！
| 特別點燈活動日期 | 請到官網查詢 |
| 網址 | eizandensha.co.jp/ |
05｜貴船神社
體驗完叡山電車紅葉隧道後，就輪到貴船神社。貴船神社係當地有名嘅戀愛結緣神社，亦是秋天賞楓秘境。喺每年11月，貴船神社嘅「紅葉燈籠祭」都吸引咗唔少遊客，在夜裡觀賞紅葉，真係別有一番風味。
貴船神社係當地有名嘅戀愛結緣神社
紅葉燈籠祭
貴船神社於11月時會舉辦一場「紅葉燈籠祭」嘅點燈活動，燈籠從貴船入口處到貴船神社。整個貴船神社內，都被紅葉和紅色燈籠包圍，十分壯觀。
| 紅葉燈籠祭日期 | 請到官網查詢 |
| 地址 | 京都市左京区鞍馬貴船町180 |
| 交通 | 乘搭市巴士17號到「出町柳駅前」，轉搭叡山電車到「貴船口駅」，轉搭京都巴士33號到「貴船」，再走5分鐘後就抵達貴船神社 |
| 網址 | kifunejinja.jp/ |