【日本愚人節惡搞】每年4月1日,日本各大品牌都會齊齊於零時零分推出「新產品」,而且全部都是當日限定,乘機惡搞一番!今年又有咩新搞作呢?(不過,今年亦有些品牌力sell自己「唔講大話」!日本人,真係估佢唔到!)

撰文:主場・日本 | 圖片:各品牌官網

旅行玩樂篇

01 | 日本航空・月球新航線

JAL公布新航線:月球!更於facebook上載試飛的相片!

02 | 東京迪士尼・Disney Sea變溫泉樂園

之前見過別府將真的遊樂場變成溫泉樂園,感覺好似好好玩。今次Disney將Disney Sea變成溫泉樂園,所有水都變成溫泉水,冬天就唔使捱凍喇!

商品篇

01 | Subway・鯖魚罐頭(原罐?)潛艇堡

今年日本Subway打頭炮,早於3月29日便發了新聞稿,表示會使用近年日本大hit的「鯖魚罐頭」,推出一日限定的「鯖魚潛艇堡」,而且更是……原罐上!一看便知是惡搞,就連Subway的名字都改為Sabaway!日文Subway的讀音是「Sa-bu-way」,鯖魚日本發音是「Sa-ba」,所以順便改做「Sabaway」吧!

口味方面,除了原味,還有味噌及醬油兩款,每個380円。

02 | KFC・淨骨(炸雞走肉!)

KFC的新商品,是「只有骨的KFC」(骨だけケンタッキー),即是炸雞走肉!更溫馨地提醒你,可以用來做火鍋或熬拉麵的湯底!

03 | 卡樂B・Pizza味薯片飲品(零卡路里!)

卡樂B更抵死!話收到顧客的查詢電話:「Pizza味薯片是飲品吧?」所以研發了這個新產品!而且更告訴你,因為只是「吸」(不是食),所以零卡路里!

04 | ILOHAS・麵包味的水、白飯味的水

ILOHAS不停推出新口味嘅水,但一直都只有水果味。今次新推出「ILOHAS朝食」,將早餐所需要的能量放入水中,味道有麵包及白飯兩種,啱晒繁忙嘅都市人,唔怕冇時間食早餐!

 

05 | Pineame・原條菠蘿糖

相信有唔少人都食過Pineame「有個窿」的菠蘿糖,今次品牌又話應顧客要求,推出「未切割之前」的原條菠蘿糖,一條大約係8粒的分量 。

06 | Mintia・薄荷糖「大容量」Server

薄荷糖食上癮的朋友最想要這個吧!Server喎!即係隨時可以「download」落嚟食!每個可以放1,000盒普通裝的Mintia,仲包免費安裝!

07 | Plus Stationery・紫菜「改錯帶」

文具製造商都玩埋一份,用改錯帶的外殼,入面轉為紫菜,變成壽司職人專用的「海苔帶」,以後整壽司會方便得多!

08 | UNI三菱鉛筆・開設海膽專門店

三菱鉛筆表示,將會開海膽專門店,更以成為3星米芝蓮餐廳為目標!其實,海膽的日文讀音是U-ni(烏ni),但鉛筆「Uni」的讀音其實是Yu-ni!

番外篇

SEGA・帶頭「愚人節唔講大話」

SEGA造咗張圖,表示「愚人節唔講大話」,更叫大家隨便攞去用!

Tokyu Hands竟然潮跟,即刻用咗張圖出post!