【大阪 空庭溫泉】東京嘅大型溫泉樂園「大江戶溫泉物語」,相信大家都唔會陌生!咁大阪方面呢,就有期待已久嘅關西最大型溫泉樂園:「空庭溫泉」!呢個溫泉樂園唔止有各式溫泉、岩盤浴、桑拿、按摩,仲有得睇show、影相打卡、bar、cafés、餐廳、手信店樣樣都有!今個月26日就開幕喇!

撰文:C|圖片:空庭溫泉 OSAKA BAY TOWER

大阪「空庭溫泉」26日開幕

「空庭溫泉」係一個以安土桃山時代為設計概念,佔地約5,000坪嘅巨大溫泉型主題樂園。呢個樂園標榜「關西地區最大型」溫泉樂園設施,大致分為4大區域:2樓為岩盤浴及各式按摩/推拿處、3樓為休憩處、4樓為巨大天台日本庭園、5樓為天然溫泉大浴場及個室溫泉。

圖片來源:空庭溫泉 OSAKA BAY TOWER
圖片來源:空庭溫泉 OSAKA BAY TOWER

其中最亮眼嘅一點,就要數大浴場喇!可邊望住充滿古代日本氣息嘅庭園,邊慢慢浸泡溫泉。雖然庭園中亦設有足湯區,即使係冬天都可以喺室外溫暖到身體,不過對於怕凍唔想留喺室外嘅人嚟講,對正庭園並有落地大玻璃嘅大浴場,就係最佳選擇!

圖片來源:空庭溫泉 OSAKA BAY TOWER
圖片來源:空庭溫泉 OSAKA BAY TOWER

另一方面,岩盤浴設施非常齊全!雖然要另外加錢先有得嘆,不過只係呢度都已經劃分成6區,既可以瞓喺度,亦可以坐住嘆岩盤浴!體驗既似桑拿,又似岩盤浴嘅新奇感覺。

圖片來源:空庭溫泉 OSAKA BAY TOWER
圖片來源:空庭溫泉 OSAKA BAY TOWER

另一個特徵就係設有日本國內最大型嘅女性用化妝間!地方非常寬敞,設計帶有豪華高級感。基本上都係自由任用,唯一要額外收費嘅係美容儀器及外借化妝品套裝。對於女性而言,簡直就係超貼心嘅服務!

館內亦不忘「打卡」呢個設計元素。空中庭園設有猶如「千本鳥居」嘅打卡位,只需領取職員派發嘅QR code,便可獲得自動攝影服務。攞住個code去館內嘅「大坂屋寫場」影樓,便可以畀錢買番張相!

咁大棟溫泉樂園,除咗基本嘅入場費之外,同時都有唔少需要額外付錢嘅服務,小心一個唔留神,就花光旅費呀!

空庭溫泉 OSAKA BAY TOWER

地址:大阪府大阪市港区弁天1丁目2-3
交通:JR大阪環狀線/大阪Metro中央線搭至弁天町站直達;大阪站(梅田)徒步10分鐘/距關西國際空港約60分鐘
營業時間:11:00am-翌日9:00am(未滿16歲獨自前來者至7:00pm;未滿18歲獨自前來者至10:00pm)
開幕日期:2019年2月26日
基本入場費:
成人:平日2,400円(約HK$168)/星期六、日及公眾假期2,600円(約HK$182)/指定日期2,800円(約HK$196)
小童:平日1,200円(約HK$84)/星期六、日及公眾假期1,300円(約HK$91)/指定日期1,400円(約HK$98)

※其他額外收費請於官網確認
休息日:每月第3個星期三(以官網日期作準,出發前請提前確認)
網址:www.solaniwa.com/