有時睇Ig,發現不少韓妹追捧的新興韓牌都沒有實體店,想買嚟試惟有靠網購! 首爾網購絕對是近年年輕人的最愛,不少超人氣品牌暫時都只有網店,由於沒有租金壓力,網購妝物絕對平靚正,而且款式新奇功效多多,就如AprilSkin、Daltoni、Suskin等都是近期大熱。但作為遊客,網購有難度嗎?A君成日去首爾,主力介紹韓國妝物,自然有網購經驗。可以話畀大家聽,其實冇難度,不過一定要留意送貨日期、運費等小陷阱避免中伏。今次公開4大網購心得,去首爾旅行前睇睇,上網做做research,睇啱心水即落單直送酒店,好方便!

01 | 計清楚送貨日期


韓國網購送貨速度其實好快,平時星期一至四中午落單,一般隔日就會發貨兼送到指定地址!為免送去酒店冇人收貨或太遲落單攞唔切,一定要計清楚送貨日期!以5日4夜行程為例,個人建議第一日落單,咁就包保送到酒店時職員會收貨!

02 | 認住「무료배송」4個字

其實不少品牌只要買滿特定金額,都會免運費!不過真心建議先買一、兩支試用,始終冇實體店測試,買完但唔適合自己皮膚就只會浪費!不妨記住「무료배송」4個韓文字,網頁上見字代表免費送貨呀!

03 | 一定要留意可否信用卡付款

購物前,記得要去睇睇付款方法!暫時還有一些品牌只接受過數,想買惟有叫當地朋友仔幫忙去銀行入數,為免睇啱心水最後買唔到,記得check清楚!

04 | 善用國際轉運服務

大型網站如G-market、11st、LOTTE等都有國際貨運功能,可以直接送到香港,但如果想買小眾品牌,就可以用國際轉運服務,找當地公司幫忙收貨再送回香港,現時香港只有公司提供類似服務,大家想網購不妨留意下!