空姐表面望落整齊、光鮮、企理,除咗係因為公司要求之外,亦係敬業嘅一部分。但你有冇諗過,空姐都係凡人,一樣會有可能夏天有腳臭、長途機冇得洗頭搞到有好「立」嘅頭?偶然仲會有蝦碌事件添,例如係絲襪被勾爛、太忙太趕做到甩頭甩髻、長途機休息後個頭散晒……

空姐傳授 4 個實用儀容小技巧


我見過,真係見過~但未驚過!因為空姐們係有好多小技巧去處理呢啲蝦碌事件,而且就算唔係做空姐嘅你都會啱用!女生們,快學以下 4 招傍身啦!

儀容秘技

01 |油立立劉海,一支爽身粉搞掂

長途機冇得洗頭,飛機又污糟,十幾個鐘焗住個頭,你都咪話唔難頂,最慘係啲劉海呀…… 立黐黐咁,被人感覺好污糟!所以好多空姐都會帶備少量爽身粉喺飛機用,只需要用少少喺劉海,搓兩搓,啲劉海就唔會立喇!仲有陣爽身粉香味添~

儀容秘技
好多空姐都會帶備少量爽身粉喺飛機用,只需要用少少喺劉海,搓兩搓,啲劉海就唔會立喇!

02 |甩頭甩髻用茶包固定

空姐髮型必須保持貼服,但係有時候太忙,或者長途機休息之後,總會秀髮亂了,如果唔記得帶髮泥,可以點?

茶包幫到你!用茶包嚟整理頭髮聽落好似好奇怪?其實呢招係髮型師朋友傳授畀我的!真係唔試過都唔信呀!先將茶包泡熱,釋出多餘水分,然後直接用茶包輕壓上你想固定嘅位置,就可以輕鬆把頭髮固定!

儀容秘技
圖片來源:News.com.au

03 | 女性護墊原來可以去腳汗腳臭

冇錯!你冇睇錯!係女性衛生護墊!其實有唔少空姐係會將一張乾淨嘅護墊墊喺鞋底,用嚟吸汗兼去除異味!護墊有香味,吸水力佳,價錢仲平過鞋墊添呀! 污糟咗咪換過第二張囉!真係超級方便衛生!

儀容秘技

04 | 穿窿絲襪用指甲油補洞

眾所周知,各大航空公司嘅空姐都係要穿著絲襪,而絲襪根本就非常容易喺工作時被勾爛,女生們應該知道,絲襪一穿窿,個窿就會隨著你嘅郁動而繼續變大…… 喺呢個時候,其實只需要用一般指甲油,直接搽喺破損位置,就可以防止絲襪穿窿位置變大,係咪好神奇呢~

儀容秘技
圖片來源:Catholic Online

其實以上小技巧喺空姐界已經唔係咩秘密嚟喇~ 不過行外人應該未必聽過嘅!希望總有一招半招你哋會覺得有用啦! 哈哈!其實我仲聽過好多奇招㗎!例如係用白酒洗手,可以令到雙手滑溜溜、用座廁墊嚟吸面油…… 真係千奇百趣呀!太搞笑嗰啲就笑下好喇~ Cheers!

如果想看更多我的文章,可以到以下網址 : )
https://www.facebook.com/parttimelolo/

fb: 兼職空姐姥姥

下一頁:台妹熱捧去暗瘡| 蜘蛛絲皂 背部痘痘救星