日本的 涼感產品 特別多,夏天行一轉 Tokyu Hands、Loft 都有大量新出品。今次我發現以下 4 款人氣產品,有創意又方便,經我同 model Rei 真人測試後,絕對值得入手!

01 | 估你唔到風扇遮-扇風機日傘


你以為佢是一把傘?其實佢是一把扇,可以神不知鬼不覺間吹著陣陣涼風。只需入四粒AA乾電池,一鍵操作,風扇就能持續兩個鐘,風力一般,但足以涼快。可擋太陽及雨水,阻隔99% UV,而且設安全網,防止頭髮及衣物捲入。缺點是太重,拿到手軟!

優點: 晴雨兼用、操作簡易、設計女性化
缺點:風力唔算強、重量達0.6公斤、價錢貴

02 | 立即變凍冰袋 | ヒヤロン冰袋

這款用完即棄冰袋在各大便利店及藥妝店都買到,主要成分為尿素及水,本身為粉狀物體,只要用力揼幾次,冰袋內的粉末在一分鐘內會變成液體,瞬間跌至低溫,用作冷敷。聲稱在30度溫度可以維持40分鐘,試用時一開始低至1.2度,約15分鐘已開始回暖。大力揼時冰包會冒出大量露水,滴到周圍都係!

優點:冷凍效果超快、便宜、四處都買得到
缺點:保冷不夠持續、用完即棄唔環保

03 | 吹你下巴風扇 | Magicool風扇仔

比芭蕉扇更加適合廢青,因為完全唔使攞!Magicool 小風扇的風口位於上方,可掛在頸上,亦有支架可以放在枱面使用,只重140克,輕巧薄身。設計靚仔,有六色可選,而且入AA 電池唔使叉電。最大敗筆為不夠強,且冇風速調校。

優點:兩手空空有涼風、設計輕巧、用乾電池方便
缺點:風力弱雞、冇風速調校、持續力短

04 | 騎呢退熱鐵片 | USB冷凍機

這冰鎮神器,開動後幾秒鐵片就會迅速變冷,最低可跌至15度,綁在額頭或後尾枕, 便會急速降溫。但試用過發覺不太舒服,因為實在太冷,而且只靠USB 發電,帶出街要連接尿袋,不太可行,唯一可取是冷凍效果持久。

優點:鐵片堅凍,拆開頭帶可敷身體其他部位
缺點:冇開關掣、要長期連住USB、外形奇特