【揀機位】去旅行第一個興奮位就係出機場去check-in,就如之前好多巴打絲打討論香港機場嘅設計,有一種令人未出發先興奮嘅感覺。正所謂好嘅開始就係成功嘅一半,坐飛機就係旅程嘅開始,其實我自己覺得冇邊個位特別好或差,好在乎個人喜好,不如我哋今次睇下飛機座位有咩可以注意下呢!

撰文:地勤夫妻去旅行

1|前座位有好有唔好

我自己呢,就唔鍾意坐咁前嘅,因為每個compartment(機艙)第一排,即係我哋叫嘅 bulkhead seat其實都係bassinet seat,即係嬰兒籃位,短程還可以,長途的話,你又怕嘈的話,真係要等個BB瞓著,你先瞓得著。我無意歧視帶BB travel嘅人,只係BB/小朋友的確係難控制啲。

BB籃會放於機艙最前排。

2|旅行團專坐後排

通常機尾都會係安排畀旅行團或人數多嘅旅客坐比較多,所以嘈嘅機率亦較高,怕嘈嘅話,可以盡量避免。亦都係較近洗手間,被打擾嘅機會就較高。另外,每個compartment最後一排有時都會有客鍾意,佢哋貪後面冇人會踢到佢哋張椅,兼且可以無後顧之憂咁大挨去後面。不過要留意番,有啲飛機最後一排係limited recline – 即係可以躺後,不過角度冇正常位一樣咁躺到最盡,自己考慮下啦!

後排位置通常留給旅行團或人數多的旅客。

3|Bulkhead同emergency seat=legroom seat

有好多人對呢啲位有特別喜好,因為可以伸長對腳,我自己就一般般。Bulkhead其實係第一排位,都係有塊板擋住,對膝頭嚟講,係冇嘢擋住,但係腳尖有=一樣都係伸唔直⋯⋯我情願坐普通位,都仲可以放對腳落前面椅底。

腳長嘅人揀唔揀legroom seat,就要視乎你究竟想頂住膝頭定係頂住腳尖。

Emergency seat 係可以伸得直,依家好多airlines都會攞嚟賣(即係額外加錢先可以坐) 。但留意番,廣體客機先至會係伸得直,窄體機的話,其實你前面都係有位,只係座位之間距離闊咗,所以睇你自己喜好了。仲有,部電視係要喺個位下面拉上嚟,拉上嚟唔係重點,起飛降落冇得睇先係重點,係電視精嘅噩夢⋯⋯然後,armrest又攞唔起(有啲情侶鍾意攞起個armrest,坐得親密啲或瞓落男友大髀,呢啲位都做唔到㗎),我自己就真係對呢啲位麻麻歡喜。

坐emergency seat就要預咗冇得睇戲睇足全程。

4|窗口位睇風景

好多客坐窗口位都係想睇風景或者冇人打擾(只會佢去廁所時打擾到人)。如果你好鍾意睇風景,可以留意下Flightradar24.com呢啲網站,睇下自己班機嘅航路,大約你會掌握到坐邊一面窗口,會睇到你想睇嘅嘢。好似呢班機,回程東京返香港坐右邊窗口應該睇到富士山,自己發掘下啦!戴番頭盔先,航路未必日日一樣嘅,但可以參考下!

Flightradar24.com

5|中間位

不幸地飛機滿座,自己本身又冇留到位,得番中間的話,我個人就鍾意坐中間嘅中間位(如果仲有得揀),比起窗口嘅中間(即係B、J),中間嘅中間(E、F)係你出去洗手間就要人起身,但如果你冇需要,係可以瞓到落機。坐B、J的話,A、K去廁所你都要讓路,真係really bad!

既然都係坐中間位,坐E、F位反而冇咁煩。

6|留意特價upgrade

有時有啲航空公司會於當天嘅航班,以特價賣出商務或者特選經濟艙,唔同航空公司有唔同package,有啲可能剩係賣個位,食就食番普通餐,有啲可能係全套upgrade有埋貴賓室、商務餐,價錢有時會超特惠,尤其是長途機,upgrade咗真係唔同好多,瞓醒先落機,有興趣豪一次就問下地勤人員啦~

想平平哋豪一次,就記得要問下地勤喇!

7|趕轉機

如果你之後有班機要駁,時間又係好tight嘅所謂perfect connection,可以的話,試下問地勤攞個較前嘅位,有時有啲航空公司開counter前,都會scan下有咩客係有tight connection嘅。點為之tight connection呢?穩陣啲問下有冇前啲嘅位,早啲落機去轉機,人都安心啲。

趕住轉機嘅話,最好坐前排。

8|做個有公德心嘅旅客

見過網上有啲所謂旅遊攻略叫人上網揀位,專登留個吉位喺中間博冇人要,呢啲行為係極為缺德嘅做法。好多時尤其是旺季,好多人都係一家幾口去旅行,當然人人都想同番屋企人朋友坐,往往就係好多人咁樣留,令到好多其他客人坐唔埋一齊。全部大人都還好,有小朋友分開坐真係慘,然後就向航空公司投訴,可惜啲位係客人留嘅,我哋都冇權叫人讓出佢哋留好嘅位。將心比心,做個有品嘅旅人。

萬一到時有個陌生人隔住咗,就唔好啦~