咁多年嚟大家手上本護照仲新唔新淨、有冇試過好離譜嘅「遇難」情況呢?阿珍份人乜都驚一餐,曾經設想過以下情景:

跌落屎坑、被狗咬碎、捲入引擎、倒瀉泡菜飯焦(黏到實一實)等等……

但係諗深一層,除非你份人好無手尾、超級俹簁,否則一般情況下,搞到護照甩皮甩骨的機會率,應該不會太高吧?!

01 | 囡囡惡作劇 Hello Kitty貼紙當入境印

無端端有此想法,當然係因為早排睇見,有台灣網民帶囡囡去完馬來西亞Hello Kitty樂園,阿女將貼紙貼滿護照簽證蓋印之間,面目全非,真係慘過被偷!

02 | 掟入洗衣機 洗濕驚動美國領事

問過身邊朋友,最爆笑的糟質Passport事件就係旅遊記者O,誤將護照連衫塞入洗衣機,過兩輪水之後才醒覺急救:「本嘢無爛,但濕曬!最慘第二日要去美國領事館攞Visa,個Staff笑住問我係咪想游水過去!」結果領事館職員畀張黃色表格阿O填,恩准佢換過本護照再去攞番個簽證,唔使重新排隊,勁有人情味!

03 | 地勤雷射眼 最怕「零空白頁」揼滿印

阿珍再問日日喺櫃位接觸無數護照嘅地勤R,佢權威總結話,香港人都好識得保護自己本護照,好少見到黏滿香口膠或滿佈煙頭印嘅恐怖證件。「如果畫花個樣,當然會被拒登機啦 ,因為會列入Defaced Travel Document,要重新申請; 不過我哋最緊張檢查嘅,反而係有冇空白頁,因為除咗半年以上未過期外,蓋滿印嘅護照亦可能被拒上機。」

R話空白頁的規例視乎航點而定,最近就有個客唔夠一整頁空百,幾乎唔畀佢飛南非,後來發現客人只係轉機去巴西、而當地又可酌情處理,幾經查問先獲得登機證,所以奉勸各位 frequent flyer 到時到候就要更新護照喇!

04 | 護照塗鴉  一年幾單?!

大陸細路塗污護照新聞,一年已經有兩樁,新近的受害爸爸好似中咗「面目全非腿」!傳說佢係韓國旅遊沖涼期間畀阿仔塗污護照,但亦有眼利網民發現「畫風」筆觸太似電腦小畫家,仲有兩條線畫咗出界,疑似係微博炒作假新聞!