富士山,除了可以在陸地睇,還可以從空中睇。

這次由東京成田返香港,終於如願在飛機睇到富士山。

彩數,確是有一點點,因為咁啱坐早機,又天朗氣清萬里無雲。不過,某程度上我還經過少少計算。

話說,我已經有幾次試過坐飛機由成田或羽田返香港時經過富士山,不過次次都唔好彩地,一係坐中間位,一係坐另一方方向的窗口位,每次都是聽到機長廣播後,或者聽到日本人驚嘆,才知走寶。
(文章授權:大世界小旅人。Joanne Cheuk

想在飛機上睇富士山,其實有少少竅門。

01|記低去程 & 回程位置

根據我多方探聽,去程坐A位、回程坐K位,看到的機會比較大。(比較大但唔代表一定睇到。)

02|預辦登機避開機翼

在網上預辦登機,所揀之窗口位都要避開機翼位置,機翼之後又會比機翼前遮擋較少。

03|回程命中率更高

由東京返香港那一程會比前往東京的一程機會比較高。因為由東京起飛約十數分鐘後,睇下窗口,只要見到天朗氣清,兼飛過橫濱港,就開始有機會見到富士山。反之,若由香港出發,因為已經坐了三個幾鐘,比較難估計飛機已到甚麼位置,也不易掌握富士山出現的時間。

04|保持清醒

不知道大家是否很容易在起飛時打瞌睡?由於起飛不久就看得到富士山,要撐住!唔好恰眼瞓。

05|靚景只限早機

早上或中午由東京返香港睇到的機會率比較高;如坐傍晚或夜機因天已黑,坐甚麼位基本上都可以疊埋心水瞓。

06|港產航空要執生

坐上日本的幾間航空公司,機長好多時會在經過富士山時開咪廣播;唯我這次坐港產的航空公司,就冇這個溫馨提示,只有自己執生。

07|分秒必爭

要影埋相就要提早預備好手機和相機,因為飛越富士山的時間只有短短一兩分鐘,摷得相機嚟,應該飛過咗。

其他網友作品:

最後,有齊以上條件及準備,但飛機航道略有不同根本冇飛過富士山,這個我就估算唔到,只有隨緣。祝君好運。http://www.gotrip.hk/columns/%E7%9D%87%E5%AF%8C%E5%A3%AB%E5%B1%B1_%E6%9D%B1%E4%BA%AC%E9%A3%9B%E9%A6%99%E6%B8%AF/